ప్రభుత్వాన్ని గద్దె దించుదాం: ఎమ్మెల్యేలతో జగన్

హైదరాబాద్: అన్ని రంగాల్లో విఫలమైన ముఖ్యమంత్రి కిరణ్ కుమార్ రెడ్డి ప్రభుత్వాన్ని గద్దె దించుదామని వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి ఆదివారం లోటస్ పాండులో జరిగిన సమావేశంలో తన ఎమ్మెల్యేలకు సూచించారు. రైతులకు భరోసా ఇవ్వని ప్రభుత్వాన్ని అధికారంలో ఉంచవలసిన అవసరం లేదని చెప్పారు. రైతు సంక్షేమం మరిచిన ప్రభుత్వాన్ని వెంటనే గద్దె దించాలని సూచించారు. రైతుల బాగు కోసం తపించిన దివంగత వైయస్ రెక్కల కష్టం మీద అధికారంలోకి వచ్చిన కాంగ్రెసు ప్రభుత్వం ఇప్పుడు అదే రైతుల బతుకులతో చెలగాటమాడుతోందని విమర్శించారు.

ఓదార్పులో రైతుల దుస్థితిని కళ్లాలా చూశానన్నారు. ఎరువుల ధరలు విపరీతంగా పెరిగిపోయాయని ఈ సమయంలో రైతన్న పరిస్థితి మరింత ఆందోళనగా మారిందన్నారు. అవిశ్వాసం ఎవరు పెట్టారన్న అంశంతో సంబంధం లేకుండా అన్ని విషయాల్లో విఫలమైన ప్రభుత్వానికి వ్యతిరేకంగా నిలబడాలని సూచించారు. విలువలకు పట్టం కట్టాలని ఎమ్మెల్యేలకు హితబోధ చేశారు.