చంద్రబాబు ఆస్తులపై సిబిఐ విచారణ ముమ్మరం

By Pratap

Published: Wednesday, December 7, 2011, 19:51 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు ఆస్తుల కేసులో విచారణను సిబిఐ ముమ్మరం చేసింది. వైయస్సార్ కాంగ్రెసు పార్టీ గౌరవాధ్యక్షురాలు వైయస్ విజయమ్మ వేసిన పిటిషన్‌పై హైకోర్టు ప్రతిస్పందిస్తూ చంద్రబాబు ఆస్తులపై ప్రాథమిక విచారణకు ఆదేశించిన విషయం తెలిసిందే. ఈ నేపథ్యం చంద్రబాబుకు సంబంధించిన ఆస్తుల వివరాలను సేకరించడంలో సిబిఐ అధికారులు చురుగ్గా కదులుతున్నారు. హైదరాబాదుతో పాటు జిల్లాల్లోని చంద్రబాబు ఆస్తులపై సిబిఐ సమాచారం సేకరిస్తోంది. సిబిఐ అధికారులు జిల్లాలకు కూడా వెళ్లారు. జిల్లా రెవెన్యూ అధికారుల నుంచి సిబిఐ సమాచారం సేకరిస్తోంది. ఇప్పటికే సబ్ రిజిస్ట్రార్ల నుంచి సమాచారాన్ని తెప్పించుకున్నట్లు సమాచారం.

చంద్రబాబు ముఖ్యమంత్రిగా ఉన్న కాలంలో తీసుకున్న మంత్రి వర్గ నిర్ణయాలపై సిబిఐ అధికారులు ఆరా తీస్తున్నారు. సచివాలయంలోని పలు శాఖల నుంచి సిబిఐ అధికారులు సమాచారం సేకరించారు. ఇందుకు గాను గత మూడు రోజులుగా సిబిఐ అధికారులు సచివాలయంలోనే మకాం వేసినట్లు తెలుస్తోంది. చంద్రబాబు ఆస్తుల కేసులో రెడ్డీ ల్యాబ్స్‌కు సిబిఐ నోటీసు జారీ చేసింది. దానికి రెడ్డీ ల్యాబ్స్ వివరణ కూడా ఇచ్చింది. కాగా, చంద్రబాబు దాఖలు చేసుకున్న వెకేట్ పిటిషన్‌పై విచారణను హైకోర్టు రేపటికి వాయిదా వేసింది. చంద్రబాబు ఆస్తుల కేసులోనే ఈనాడు దినపత్రిక అధిపతి రామోజీరావు దాఖలు చేసుకున్న వెకేట్ పిటిషన్‌పై విచారణ ముగిసింది.

Published On December 7, 2011