అవిశ్వాస తీర్మానంలో విచక్షణతో ఓటు వేశాను: జెపి

హైదరాబాద్: తెలుగుదేశం పార్టీ ప్రవేశ పెట్టిన అవిశ్వాస తీర్మానంలో తాను విచక్షణతో ఓటు వేశానని లోక్ సత్తా అధినేత, కూకట్ పల్లి శాసనసభ్యుడు జయప్రకాశ్ నారాయణ గురువారం అన్నారు. అవిశ్వాసానికి అనుకూలంగా కాకుండా, వ్యతిరేకంగా కాకుండా తటస్థ ఓటు వేశానని చెప్పారు. ప్రజా సమస్యలపై అధికార, ప్రతిపక్ష పార్టీలకు పెద్దగా తేడా ఏమీ లేదన్నారు. అధికారాన్ని ఏదోరకంగా నిలబెట్టుకునేందుకు కాంగ్రెసు, అధికారంలోకి రావడానికి ప్రతిపక్ష పార్టీలు ప్రయత్నాలు చేస్తున్నాయని విమర్శించారు. ఏ పార్టీ ప్రజా సమస్యలపై చిత్తశుద్ధితో స్పందించడం లేదన్నారు.

తాత్కాలిక ప్రయోజనాల కోసం ప్రజలతో ఆడుకోవడం రాజకీయ పార్టీలకు నిత్యకృత్యమైందన్నారు. స్థానిక సంస్థల బలోపేతానికి రాజ్యాంగ సవరణ చేయాలని చెప్పారు. మూడంచెల వ్యవస్థతో పాటు స్థానిక సంస్థలకు పూర్తి ఆధికారాలిచ్చేలా సంస్కరణలు తేవాలని ఆయన అన్నారు. లోక్‌సత్తా రూపొందించిన లోక్‌పాల్ వ్యవస్థే రానుందని ఆయన చెప్పారు.

English summary

Loksatta President Jayaprakash Narayana blamed TDP and Congress for no-confidence motion.