సోనియాతో కిరణ్ కుమార్ రెడ్డి భేటీ, ఆజాద్ కూడా

By Pratap

Published: Saturday, December 10, 2011, 13:40 [IST]

న్యూఢిల్లీ: ఢిల్లీ ముఖ్యమంత్రి కిరణ్ కుమార్ రెడ్డి బిజీగా ఉన్నారు. కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్‌తో తొలుత ముఖ్యమంత్రి చర్చలు జరిపారు. ఆ తర్వాత ఆజాద్ కాంగ్రెసు అధ్యక్షురాలు సోనియా గాంధీతో సమావేశమయ్యారు. అదే సమయంలో ముఖ్యమంత్రి కిరణ్ కుమార్ రెడ్డికి కూడా సోనియా నుంచి పిలుపు వచ్చింది. ఆజాద్, అహ్మద్ పటేల్‌లతో కలిసి కిరణ్ కుమార్ రెడ్డి సోనియా గాంధీతో చర్చలు జరిపారు. వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గం శాసనసభ్యులపై అనర్హత వేటు వేసే విషయంపై, తెలంగాణ అంశంపై, రాష్ట్రంలో తాజా రాజకీయ పరిస్థితులపై, చిరంజీవికీ ఆయన వర్గానికీ కల్పించాల్సిన స్థానాలపై వారు చర్చలు జరిపినట్లు తెలుస్తోంది.

సోనియాతో సమావేశం తర్వాత ముఖ్యమంత్రి కిరణ్ కుమార్ రెడ్డి ఆజాద్ కలిసి బయటకు వెళ్లిపోయారు. కిరణ్ కుమార్ రెడ్డిని ఆజాద్ తన నివాసానికి తీసుకుని వెళ్లారు. ఆజాద్ తన నివాసంలో కిరణ్ కుమార్ రెడ్డితో మరో దఫా చర్చలకు దిగారు. వారిద్దరు ప్రధాని డాక్టర్ మన్మోహన్ సింగ్‌ను కలిసే అవకాశం ఉంది. పిసిసి అధ్యక్షుడు బొత్స సత్యనారాయణ శనివారం సాయంత్రానికి ఢిల్లీ చేరుకుంటారు. ఈలోగా ముఖ్యమంత్రితో కాంగ్రెసు అధిష్టానం చర్చలు పూర్తి చేయాలనే ఉద్దేశంతో ఉంది. బొత్స సత్యనారాయణతో చర్చలు జరిపిన అనంతరం వివిధ విషయాలపై పార్టీ అధిష్టానం చర్యలు తీసుకుంటుంది. తెలంగాణ అంశాన్నితేల్చిన తర్వాతనే మంత్రి వర్గ విస్తరణ ఉంటుందని ఆజాద్ శుక్రవారం చెప్పారు. దీంతో తెలంగాణ అంశంపై సీరియస్‌గానే అధిష్టానం వర్గం పెద్దలు ముఖ్యమంత్రితో చర్చించినట్లు సమాచారం.

Published On December 10, 2011