పంతం నెగ్గించుకున్న చిరు, ముగ్గురికి పదవులు

By Pratap

Published: Tuesday, December 20, 2011, 17:58 [IST]

న్యూఢిల్లీ: కాంగ్రెసు అధిష్టానం వద్ద ప్రజారాజ్యం శాసనసభా పక్ష నేత, కాంగ్రెసు నాయకుడు చిరంజీవి తన పంతం నెగ్గించుకున్నారు. తన వర్గం శాసనసభ్యులకు మంత్రి పదవులు ఇప్పించుకోవడంలో విజయం సాధించినట్లు తెలుస్తోంది. ఒక్కో ప్రాంతానికి ఒక్కరు చొప్పున ప్రజారాజ్యం పార్టీ శాసనసభ్యులకు మంత్రి పదవులు ఇవ్వాలని ఆయన పట్టుబట్టారు. ఇందుకు కాంగ్రెసు అధిష్టానం అంగీకరించినట్లు సమాచారం. దీనిపై కాంగ్రెసు అధిష్టానంతో చర్చలు జరిపేందుకు ఢిల్లీ వచ్చిన ఆయన ముఖ్యమంత్రి కిరణ్ కుమార్ రెడ్డి మంత్రి వర్గ విస్తరణకు కూడా ముహూర్తం నిర్ణయించినట్లు తెలుస్తోంది.

ప్రజారాజ్యం పార్టీ శాసనసభ్యులను ముగ్గురిని మంత్రివర్గంలోకి తీసుకోవడానికి కాంగ్రెసు అధిష్టానం అంగీకరించినట్లు తెలుస్తోంది. ఇందుకు గాను కిరణ్ కుమార్ రెడ్డి ఈ నెలాఖరున మంత్రివర్గ విస్తరణ చేపడతారని అంటున్నారు. కేవలం ప్రజారాజ్యం పార్టీ శాసనసభ్యులకు మంత్రి పదవులు కల్పించడానికే ఈ విస్తరణ ఉంటుందని చెబుతున్నారు. కోస్తా నుంచి గంటా శ్రీనివాస రావుకు, రాయలసీమ నుంచి సి. రామచంద్రయ్యకు, తెలంగాణ నుంచి అనిల్‌కు మంత్రి పదవులు దక్కే అవకాశాలున్నట్లు ప్రచారం జరుగుతోంది.

ప్రజారాజ్యం పార్టీకి చెందిన వంగా గీత, బండారు సత్యనారాయణ రాజు, కన్నబాబు మంత్రి పదవుల కోసం తీవ్రంగా ప్రయత్నాలు సాగిస్తున్నారు. ప్రజారాజ్యం పార్టీ కాంగ్రెసులో విలీనం కావడానికి తీవ్రంగా ప్రయత్నాలు చేసిన సి. రామచంద్రయ్యకు, గంటా శ్రీనివాసరావుకు మంత్రి పదవులు ఇస్తామని కాంగ్రెసు నాయకత్వం తేల్చి చెప్పినట్లు సమాచారం. కాగా, తెలంగాణకు చెందిన ఇద్దరు శానససభ్యుల్లో మహేశ్వర రెడ్డికి మొండిచేయి చూపే అవకాశాలున్నాయి.

Published On December 20, 2011