గాలికి కన్నడ మంత్రి బాసట, శ్రీలక్ష్మిపై త్వరలో ఛార్జిషీట్

By Srinivas

Published: Wednesday, December 28, 2011, 9:28 [IST]

హైదరాబాద్/న్యూఢిల్లీ: కర్నాటక మాజీ మంత్రి గాలి జనార్ధన్ రెడ్డిని మైనింగ్ కేసులో కావాలని కొన్ని శక్తులు కుట్ర పన్ని ఇరికించాయని కర్నాటక మంత్రి ఆనంద్ అస్నోటికర్ మంగళవారం ఆరోపించారు. ఓఎంసి కేసులో అరెస్టై చంచల్‌గూడ జైల్లో ఉన్న గాలి జనార్ధన్ రెడ్డిని ఆయన పరామర్శించారు. అనంతరం విలేకరులతో మాట్లాడారు. గాలి త్వరలో నిర్దోషిగా బయటకు వస్తారని ఆశాభావం వ్యక్తం చేశారు. ఆయన తనకు పెద్దన్నలాంటి వాడని, అందుకే వ్యక్తిగతంగా జైల్లో కలిసి పరామర్శించినట్లు చెప్పారు.

కాగా ఓబుళాపురం అక్రమ మైనింగ్ కేసులో నిందితురాలు శ్రీలక్ష్మి పాత్రపై త్వరలో నేరాభియోగ పత్రాన్ని దాఖలు చేయనున్నట్లు సిబిఐ మంగళవారం న్యూఢిల్లీలో వెల్లడించింది. నేరాభియోగ పత్రం దాఖలు చేయనున్నప్పటికీ ఎప్పుడు దాఖలు చేసేది చెప్పలేమన్నారు. రాష్ట్రంలో ప్రస్తుతం కొనసాగుతున్న వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి ఆస్తుల కేసు, ఓఎంసి, ఎమ్మార్ కేసులను సిబిఐ డైరెక్టర్ సమీక్షించారు. ఈ సమావేశంలో ఈ కేసులను విచారిస్తున్న జాయింట్ డైరెక్టర్ లక్ష్మీ నారాయణ ఉన్నారు. లక్ష్మీ నారాయణ రెండు రోజుల క్రితం ఢిల్లీ వెళ్లిన విషయం తెలిసిందే.

Published On December 28, 2011