చంద్రబాబుపై నిప్పులు చెరిగిన పొన్నం ప్రభాకర్

న్యూఢిల్లీ: తెలంగాణ విషయంలో తెలుగుదేశం పార్టీ అధ్యక్షుడు నారా చంద్రబాబు నాయుడిపై కాంగ్రెసు కరీంనగర్ పార్లమెంటు సభ్యుడు పొన్నం ప్రభాకర్ నిప్పులు చెరిగారు. తెలంగాణపై చంద్రబాబు స్పష్టమైన వైఖరి ప్రకటించాలని ఆయన డిమాండ్ చేశారు. తాను తెలంగాణకు అనుకూలమని చంద్రబాబు కేంద్ర హోం మంత్రి పి. చిదంబరం ముందు చెప్పాలని, ఆ మేరకు చంద్రబాబు లిఖితపూర్వకంగా హామీ ఇవ్వాలని ఆయన డిమాండ్ చేశారు. చంద్రబాబు చెప్పిన తర్వాత తెలంగాణ రాకపోతే తమదే బాధ్యత అని ఆయన అన్నారు.

చంద్రబాబు పసుపు దండు గూండాలతో తెలంగాణలో దండయాత్ర చేస్తున్నారని ఆయన వ్యాఖ్యానించారు. రైతుల ఆత్మహత్యలకు చంద్రబాబే బాధ్యుడని ఆయన విమర్శించారు. రైతుల గురించి మాట్లాడే హక్కు చంద్రబాబుకు లేదని ఆయన అన్నారు. తెలంగాణ తెలుగుదేశం నాయకులు పార్టీ నుంచి బయటకు వచ్చి వేరే పెట్టుకోవాలని ఆయన సూచించారు. తెలుగుదేశం పార్టీ అధ్యక్షుడు నారా చంద్రబాబు నాయుడు మంగళవారం కరీంనగర్ జిల్లాలో రైతు పోరు బాటు నిర్వహించిన విషయం తెలిసిందే. ఈ సందర్భంగా జరిగిన బహిరంగ సభలో ఆయన మాట్లాడుతూ - తాను తెలంగాణకు వ్యతిరేకం కాదని చెప్పారు. దీనిపైనే పొన్నం ప్రభాకర్ స్పందించారు.

English summary

Congress Telangana MP Ponnam Prabhakar lashed out at TDP president N Chandrababu Naidu.