అమరవీరుల స్థూపం వద్ద టిఆర్ఎస్ ఆందోళన, అరెస్టు

By Srinivas

Published: Wednesday, December 28, 2011, 10:54 [IST]

హైదరాబాద్: తెలంగాణ కోసం ఆత్మార్పణం చేసుకున్న విద్యార్థులను కించపర్చే విధంగా తెలుగుదేశం పార్టీ నేత మోత్కుపల్లి నర్సింహులు వ్యాఖ్యానించారంటూ తెలంగాణ రాష్ట్ర సమితి విద్యార్థి విభాగం బుధవారం గన్ పార్కులోని అమరవీరుల స్థూపానికి పాలాభిషేకం చేసింది. మోత్కుపల్లి వ్యాఖ్యలపై వారు తీవ్రంగా మండిపడ్డారు. బుధవారమే మోత్కుపల్లి గన్ పార్కు వద్ద రెండురోజుల దీక్షకు పూనుకున్నారు. దీంతో పోలీసులు ఆందోళనకారులను అక్కడ నుండి పంపించే ప్రయత్నాలు చేశారు. వారు వెళ్లక పోవడంతో పోలీసులు వారిని అరెస్టు చేశారు. దీంతో అక్కడ పరిస్థితి ఉద్రిక్తంగా మారింది.

విద్యార్థుల అరెస్టును టిఆర్ఎస్ నేత శ్రవణ్ కుమార్ ఖండించారు. ప్రజాస్వామ్య దేశంలో దీక్షలు చేసుకునే హక్కు లేదా అని ప్రశ్నించారు. మోత్కుపల్లి వంటి తెలంగాణ నేతలు చంద్రబాబు తొత్తులుగా మారారని విమర్శించారు. బాబు రైతు యాత్ర పేరుతో దండయాత్ర చేస్తున్నారన్నారు. తెలంగాణను బాబు కలుషితం చేస్తున్నారని విమర్శించారు.

Published On December 28, 2011