వెనక్కి ఏం తీసుకున్నాం?: జగన్‌కు శ్రీధర్ బాబు ప్రశ్న

By Srinivas

Published: Thursday, January 12, 2012, 16:59 [IST]

హైదరాబాద్: దివంగత ముఖ్యమంత్రి వైయస్ రాజశేఖర రెడ్డి పథకాలను అంతకంటే మెరుగ్గా కొనసాగిస్తామని ప్రభుత్వం చెబుతుంటే వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఏమీ చేయడం లేదని ఎలా చెబుతున్నారని పౌరసరఫరాల శాఖ మంత్రి శ్రీధర్ బాబు గురువారం ప్రశ్నించారు. వైయస్ ఆశయాలు కొనసాగిస్తామని స్పష్టం చేశారు. ఏ పథకం వెనక్కి తీసుకున్నామో జగన్ చెప్పాలన్నారు. తెలంగాణపై స్పష్టమైన వైఖరి చెప్పకుండానే జగన్‌ను ఎలా దీక్ష చేయనిస్తున్నారని టిఆర్ఎస్ అధ్యక్షుడు కె చంద్రశేఖర రావును ప్రశ్నించారు. ఆయన దీక్షను ఎందుకు అడ్డుకోవడం లేదన్నారు. పార్టీ పరంగా ఎలాంటి ప్రకటన చేయలేదని చెప్పారు. వారి మధ్య ఉన్న ఒప్పందమేమిటో చెప్పాలన్నారు. ఉప ఎన్నికల్లో కాంగ్రెసు పార్టీ గెలుస్తుందన్నారు. మా పథకాలతో ప్రతిపక్షాలకు భయం పట్టుకుందని అందుకే దీక్షలు, యాత్రలు చేస్తున్నారన్నారు.

రాజకీయ పార్టీ నిర్మాణం కోసమే జగన్ దీక్ష, ఆయన దీక్షకు అర్థమే లేదని విమర్శించారు. కాంగ్రెసు ప్రజాస్వామ్యాన్ని కోరుకునే పార్టీ అని ఎవరు ఎక్కడైనా వెళ్లి తమ సిద్ధాంతాలు చెప్పుకోవచ్చునన్నారు. రైతులకు మద్దతు ధర ఇవ్వడానికి ప్రభుత్వం కృషి చేస్తోందన్నారు. గతంతో పోలిస్తే నిత్యావసర వస్తువుల ధరలు కొద్దిగా పెరిగాయని, పెరుగుదల నియంత్రణకు చర్యలు తీసుకుంటామన్నారు. పప్పులు, గ్యాస్‌పై సబ్సిడిని ఎత్తివేసే ఆలోచనల లేదన్నారు.

Published On January 12, 2012