ముఖ్యమంత్రి కిరణ్ కుమార్ రెడ్డి ఎస్మా రెడ్డే: కెసిఆర్

By Pratap

Published: Thursday, February 2, 2012, 18:35 [IST]

హైదరాబాద్: ఎందరు ఎన్ని అవాకులు చవాకులు పేలినా తెలంగాణ ఉద్యమాన్ని ప్రపంచంలోని ఏ శక్తీ ఆపలేదని, తెలంగాణ సాధించే వరకు ఉద్యమం ఆగేది లేదని, తెలంగాణ సాధించుకోకుండా ఆగేదే అయితే 11 ఏళ్లుగా సాగి ఉండేది కాదని తెలంగాణ రాష్ట్ర సమితి (తెరాస) అధ్యక్షుడు అన్నారు. తెరాస కార్మిక విభాగం డైరీనీ, క్యాలెండర్‌ను ఆయన గురువారం సాయంత్రం ఆవిష్కరించి ప్రసంగిచారు. ఉధృతంగా తెలంగాణ ఉద్యమాలు జరిగాయని ఆయన చెప్పారు. తోలు మందం ఉన్న కేంద్ర ప్రభుత్వాన్ని నిందించాలని, గుడ్డి, చెవిటి, మూగ ప్రభుత్వం కేంద్రంలో ఉందని, కేంద్రం దిగి రాక తప్పదని ఆయన అన్నారు. అందరి రంగులు బయటపడ్డాయని ఆయన అన్నారు. తెలంగాణ ఏర్పడే వరకు విశ్రమించబోమని ఆయన అన్నారు. కిరణ్ కుమార్ రెడ్డి ఎస్మా రెడ్డి అని ఆయన అభివర్ణించారు. ఆందోళనలు చేస్తే ఎస్మా ప్రయోగిస్తామని అంటున్నారని ఆయన విమర్శించారు.

లక్ష మందికి ఉద్యోగాలు ఇస్తామని చెబుతున్న కిరణ్ కుమార్ రెడ్డి కాంట్రాక్టు ఉద్యోగులను క్రమబద్దీకరించడం లేదని ఆయన అన్నారు. తలా తోక ఉన్న ప్రభుత్వమా, లేని ప్రభుత్వమా అని ఆయన అడిగారు. చంద్రబాబు కాంట్రాక్టు పద్ధతిని ప్రవేశపెట్టారని, అందరు దాన్ని కొనసాగిస్తున్నారని ఆయన అన్నారు. కాంట్రాక్టు ముఖ్యమంత్రిని, కాంట్రాక్టు మంత్రులను పెడితే ప్రభుత్వం ఇంత కన్నా బాగా నడుస్తుందని ఆయన అన్నారు. తెలంగాణ రాగానే కాంట్రాక్టు ఉద్యోగాలను క్రమబద్దీకరిస్తామని ఆయన హామీ ఇచ్చారు.

తెలంగాణలో సాగు భూములకు నీళ్లు ఇవ్వడం లేదని, నగరం వచ్చి ఆటోలు నడుపుదామంటే రావద్దని చెబుతున్నారని ఆయన అన్నారు. ఆందోళనలతో రాష్ట్రం నలుమూలలా తగులబడుతోందని ఆయన అన్నారు. తెలంగాణ సాధనే తమ ఏకైక లక్ష్యమని ఆయన అన్నారు. పత్రికలు, చానెళ్లు దుర్మార్గంగా ప్రచారం చేస్తున్నాయని, ఎవరు ఏం ప్రచారం చేసినా తమను ఏమీ చేయలేరని, మళ్లీ పెద్ద యెత్తున ఉద్యమిద్దామని, కార్యాచరణ రూపొందిస్తామని ఆయన అన్నారు. మార్చిలో ఉద్యమం పెంచితే విద్యార్థులకు ఇబ్బందులకు కలుగుతాయని, అందువల్ల ఉద్యమం ఏ సమయంలో ఉండాలనే ఆలోచన సాగుతోందని ఆయన అన్నారు. తెలంగాణ కోసం మరోసారి జూలు దులుపుదామని ఆయన అన్నారు. ముందుకు సాగుదాం, తెలంగాణ సాధిద్దాం, ఆత్మగౌరవంతో బతుకుదామని ఆయన పిలుపునిచ్చారు.

Published On February 2, 2012