తప్పును చంద్రబాబుపైకి నెట్టిన జగన్ పార్టీ నేత

By Pratap

Published: Monday, February 6, 2012, 16:52 [IST]

హైదరాబాద్: ఎమ్మార్ ప్రాపర్టీస్ వ్యవహారంలో జరిగన తప్పును వైయస్ జగన్ నాయకత్వంలోని వైయస్సార్ కాంగ్రెసు పార్టీ అధికార ప్రతినిధి జూపూడి ప్రభాకర్ రావు తెలుగుదేశం పార్టీ అధ్యక్షుడు నారా చంద్రబాబు నాయుడిపైకి నెట్టారు. నల్లా సూర్యప్రకాశ్‌తో కలిసి ఆయన సోమవారం మీడియా ప్రతినిధులతో మాట్లాడారు. ఐఎంజి కుంభకోణానికి సంబంధించిన పాపమంతా చంద్రబాబుదేనని ఆయన అన్నారు. ఆపద్ధర్మ ప్రభుత్వంలో ఉన్న చంద్రబాబు నిర్ణయం తీసుకున్నారని ఆయన చెప్పారు. వ్యక్తిగా చంద్రబాబు ఒక్కరే ఎందుకు నిర్ణయం తీసుకున్నారని ఆయన ప్రశ్నించారు. తన వ్యక్తిగత నిర్ణయాన్ని చంద్రబాబు మంత్రి వర్గం సమిష్టి నిర్ణయంగా చెప్పుకున్నారని ఆయన విమర్శించారు.

ఎమ్మార్ ప్రాపర్టీస్, తదితర కేసుల్లో ఐఎఎస్ అధికారులను బలిపశువులుగా చేయడానికి కుట్ర చేస్తున్నారని ఆయన అన్నారు. తప్పుడు నిర్ణయాలతో రాష్ట్రాన్ని సర్వనాశనం చేస్తున్నారని ఆయన వ్యాఖ్యానించారు. ఐఎఎస్ అధికారులపై జరుగుతున్న సిబిఐ దర్యాప్తుపై ప్రభుత్వం ఎందుకు స్పందించడం లేదని ఆయన అడిగారు. నిర్ణయాలు తీసుకున్న మంత్రులు ఎందుకు తప్పించుకుంటున్నారని ఆయన ప్రశ్నించారు.

Published On February 6, 2012