తిరుపతి వెళ్లేందుకు అభ్యంతరం లేదు: కోర్టుకు సిబిఐ

By Srinivas

Published: Tuesday, February 7, 2012, 13:33 [IST]

హైదరాబాద్: ఎమ్మార్ కేసులో నిందితుడు తుమ్మల రంగా రావు తిరుపతి వెళ్లేందుకు తమకు ఎలాంటి అభ్యంతరం లేదని సిబిఐ న్యాయస్థానానికి మంగళవారం తెలియజేసింది. ఎమ్మార్ కేసులో పన్నెండవ నిందితుడు అయిన తుమ్మల రంగారావు తనను తిరుపతి వెళ్లేందుకు మూడు రోజులు అనుమతించాలని సిబిఐ ప్రత్యేక కోర్టులో పిటిషన్ దాఖలు చేశారు. ఈ పిటిషన్ పైన కోర్టు ఉదయం విచారణ జరిపింది. ఆయన పిటిషన్ పైన సిబిఐని కోర్టు ప్రశ్నించింది. అందుకు సిబిఐ ఎలాంటి అభ్యంతరం వ్యక్తం చేయలేదు. దీంతో కోర్టు ఆయనకు తిరుపతి వెళ్లేందుకు అనుమతిచ్చింది. తుమ్మల రంగారావు ఈ నెల 9, 10, 11 తేదీల్లో తిరుపతి వెళ్లనున్నారు.

కాగా ఎమ్మార్ ప్రాపర్టీస్ కుంభకోణం కేసులో అరెస్టయిన సునీల్ రెడ్డి నివాసంలో సిబిఐ అధికారులు సోమవారం సోదాలు నిర్వహించిన విషయం తెలిసిందే. సునీల్ రెడ్డిని అరెస్టు చేసిన నేపథ్యంలో ఓసారి సిబిఐ అధికారులు ఆయన నివాసంలో సోదాలు చేశారు. ఆయనను తమ కస్టడీకి తీసుకుని మూడు రోజుల పాటు విచారించిన సిబిఐ మరోసారి ఆయన నివాసంలో సోదాలు నిర్వహించింది. విల్లాల కొనుగోలుదారుల నుంచి సునీల్ రెడ్డి డబ్బులు వసూలు చేశాడని సిబిఐ అనుమానిస్తోంది. దీంతో ఆయనను అరెస్టు చేసి, విచారించింది. సునీల్ రెడ్డి సిబిఐ కస్టడీ సోమవారం ముగిసింది.

Published On February 7, 2012