మద్యం మత్తులో హోటల్లో శ్రీలంక మంత్రి హల్‌చల్

By Srinivas

Published: Sunday, February 12, 2012, 9:46 [IST]

చెన్నై: మద్యం మత్తులో శ్రీలంక దేశానికి చెందిన ఓ మంత్రి కోయంబత్తూరులోని ఓ హోటల్‌లో శుక్రవారం రాత్రి వీరంగం సృష్టించారు. తమిళనాడులోని తిరుచ్చిలో స్నేహితుడి ఇంట్లో వివాహానికి హాజరైన ఆయన మరో స్నేహితుడిని కలవడం కోసం కోయంబత్తూరు వెళ్లారు. రేస్ కోర్సులోని ఓ స్టార్ హోటల్‌లో తన అనుచరులతో కలిసి బస చేశారు. ఆర్ధరాత్రి సమయంలో రిసెప్షన్‌లోని మహిళా సిబ్బందితో దురుసుగా ప్రవర్తించారు. తాను భారత దేశానికి వచ్చిన అతిథినని, తనను ఎవరూ ఏమీ చేయబోరంటూ హల్ చల్ చేశారు.

సమాచారం అందుకున్న పోలీసులు వెంటనే హోటల్ వద్దకు చేరుకున్నారు. మంత్రిని శాంతింప చేయడానికి కాసేపు ప్రయత్నించారు. అయితే ఆయన పోలీసులతోనూ వాగ్వాదానికి దిగారు. దీంతో ఏం చేయాలో పాలుపోని పోలీసులు అతనిని ఎత్తుకొని వెళ్లి గదిలో పెట్టి గడియ పెట్టారు. శ్రీలంక మంత్రి వచ్చిన విషయం తెలుసుకున్న నామ్ తమిళర్ కచి కార్యకర్తలు శనివారం ఆ హోటల్ వద్ద ఆందోళనకు దిగారు. ఆయన వెంటనే భారత దేశం వదిలి వెళ్లాలని డిమాండ్ చేశారు.

Published On February 12, 2012