చంద్రబాబు నుండి నాయకత్వాన్ని మార్చాలి: కాంగ్రెస్

By Srinivas

Published: Saturday, February 25, 2012, 16:32 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడుపై మంత్రులు, కాంగ్రెసు పార్టీ నేతలు శనివారం వేర్వేరుగా తీవ్రస్థాయిలో విరుచుకుపడ్డారు. చంద్రబాబు నిందితుడని రికార్డుల్లో ఉన్న విషయాన్నే ముఖ్యమంత్రి కిరణ్ కుమార్ రెడ్డి చెప్పారని మంత్రి శైలజానాథ్ అన్నారు. తెలుగుదేశం పార్టీ నోటీసులు ఇచ్చినప్పుడు మేం స్పీకర్‌కు సమాధానం చెబుతామన్నారు. సభలో ఓడినా బాబు తామే గెలిచామని అంటున్నారని ఎద్దేవా చేశారు. సభలో బాబు తీరును చూసి ప్రజలు ఆయనను ఛీకొడుతున్నారని విమర్శించారు. తెలుగుదేశం పార్టీ నాయకత్వాన్ని మార్చే విషయమై ఆలోచించాలన్నారు. కోర్టు నుండి స్టే తెచ్చుకున్న బాబు ఏడో పేజీ మిస్ అయిందని చెప్పడం విడ్డూరంగా ఉందన్నారు. బాబుకు నిర్లజ్జగా మాట్లాడటం అలవాటేనన్నారు. మద్యం సిండికేట్లపై సోమవారం మరోసారి చర్చించేందుకు తాము సిద్ధంగా ఉన్నామని బాబు సిద్దమా అని సవాల్ విసిరారు.

తొమ్మిది గంటల చర్చలో బాబు అధిక సమయం తీసుకున్నారన్నారు. కానీ ఒక్క విషయం కూడా బయట పెట్టలేదన్నారు. బాబు తన సహచరులతో రంకెలు వేయిస్తున్నారని విమర్శించారు. అసత్యాలను సత్యాలుగా మార్చాలని బాబు ప్రయత్నాలు చేశారన్నారు. సరకు, సత్తా లేని బాబు మమ్మల్ని ఏమీ చేయలేరన్నారు. టిడిపి నాయకత్వ మార్పుపై ఆలోచించాలని మరో మంత్రి కొండ్రు మురళి అన్నారు. బలహీన వర్గాలకు చెందిన మంత్రి మోపిదేవి వెంకట రమణను లక్ష్యంగా చేసుకొని తొమ్మిది గంటల సభా సమయాన్ని వృథా చేశారన్నారు. టిడిపి తీరు కొండను తవ్వి ఎలుకను పట్టినట్లుగా ఉందన్నారు. తెలుగుదేశం పార్టీ తీరు చూస్తుంటే బిసిలపై కక్ష కట్టినట్లుగా కనిపిస్తోందని మంత్రి పార్థసారథి విజయవాడలో అన్నారు. మరోసారి ముఖ్యమంత్రి కాలేనని తెలిసే చంద్రబాబు నాయుడు ఇష్టం వచ్చినట్లుగా మాట్లాడుతున్నారని రుద్రరాజు పద్మరాజు అన్నారు.

Published On February 25, 2012