బిజెపితో చంద్రబాబు కలిసి పనిచేయాలి: దాడి వాదన

By Pratap

Published: Friday, March 2, 2012, 19:14 [IST]

హైదరాబాద్: కాంగ్రెసును ఓడించడానికి బిజెపితో కూడా కలసి పనిచేయాలని తాను తమ పార్టీ అధ్యక్షుడు నారా చంద్రబాబు నాయుడికి సూచించినట్లు తెలుగుదేశం పార్టీ సీనియర్ నాయకుడు దాడి వీరభద్ర రావు తెలిపారు. ఇది తన వ్యక్తిగత అభిప్రాయమని ఆయన శుక్రవారం మీడియా ప్రతినిధుల సమావేశంలో అన్నారు. ప్రతిపక్షాలు ఐక్యం కాకపోవడం వల్లనే కాంగ్రెసు లాభపడుతోందని, ప్రతిపక్షాలు ఏకమైతే కాంగ్రెసును ఓడించవచ్చునని ఆయన అన్నారు. ఇందుకు అనుగుణంగా పనిచేయాల్సిన అవసరం ఉందని ఆయన అన్నారు.

బిజెపికి దూరంగా ఉండాలన్నదే ప్రస్తుతానికి తమ పార్టీ విధానమని ఆయన చెప్పారు. కాంగ్రెసేతేర పార్టీలన్నీ దేశవ్యాప్తంగా ఏకమై పని చేయాల్సిన అవసరం ఉందని ఆయన అన్నారు. పార్టీలు విడిపోవడం వల్ల కాంగ్రెసు గెలుస్తోందని ఆయన అన్నారు. ఇటు బిజెపితో, అటు వామపక్షాలతో కలిసి పనిచేయడం ద్వారా కాంగ్రెసును ఓడించాల్సిన అవసరం ఉందని ఆయన అన్నారు. దీన్ని బట్టి తెలుగుదేశం పార్టీలో బిజెపి అనుకూల వైఖరి ప్రారంభమవుతోందనే భావన ఏర్పడుతోంది. రాష్ట్రంలో రెండు వామపక్షాలు సిపిఐ, సిపిఎం కూడా తమకు దూరమైన నేపథ్యంలో తెలుగుదేశం ఆలోచన ఆ దిశగా సాగుతున్నట్లు చెప్పవచ్చు.

Published On March 2, 2012