టిడిపి ఎమ్మెల్యేకు జెపి కితాబు, బాబుపై అసంతృప్తి!

By Srinivas

Published: Friday, March 2, 2012, 10:45 [IST]

హైదరాబాద్: తెలుగుదేశం పార్టీ శాసనసభ్యుడు తుమ్మల నాగేశ్వర రావుకు లోక్ సత్తా అధ్యక్షుడు, కూకట్ పల్లి శాసనసభ్యుడు జయప్రకాశ్ నారాయణ గురువారం కితాబిచ్చారు. అసెంబ్లీలో జరిగిన చర్చలో తుమ్మల బాగా మాట్లాడారని ప్రశంసించారు. అసెంబ్లీలో లాబీల్లో ఇద్దరూ పరస్పరం ఎదురు పడ్డారు. ఈ సందర్భంగా వారిద్దరి మధ్య ఆసక్తికర చర్చ జరిగింది. ఫెంటాస్టిక్, సభలో మీరు బాగా మాట్లాడారు. కాంగ్రెసు ప్రభుత్వాన్ని ఇంతగా నిలబెట్టి కడిగేసిన వక్తలు లేరు అని జెపి తుమ్మలను పొగొడ్తలతో ముంచెత్తారు. మళ్లీ అతనే, మీ పార్టీ అధ్యక్షుడు నారా చంద్రబాబు నాయుడు మీలాంటి మంచి వక్తలను సరిగా ఉపయోగించుకుంటున్నట్లు లేదని అన్నారు.

మీలాంటి వాళ్లను మూడేళ్లకోసారి మీ నాయకుడు ఉపయోగించుకుంటున్నట్టున్నారు. అందుకే సభలో విఫలమవుతున్నట్టున్నారని ఆయన అన్నారు. దానికి తుమ్మల అవసరమైనప్పుడు మా నాయకుడికి ఉపయోగపడాల్సిన బాధ్యత మాదేనని, బాబు మమ్మల్ని ఉపయోగించుకోకపోవటం అనేది ఏమీ లేదని, ఆయన సమయానుకూలంగా అవకాశాలు ఇస్తున్నారని, మేం ఉపయోగించుకుంటున్నామని నవ్వూతూ జెపితో చెప్పారు.

Published On March 2, 2012