వైయస్ భూపందేరం, జగన్‌కు పెట్టుబడులు: సిబిఐ

హైదరాబాద్: వైయస్ రాజశేఖర రెడ్డి ముఖ్యమంత్రిగా ఉన్నప్పుడు వివిధ వ్యక్తులకు 20 వేల ఎకరాలు కేటాయించారని, వారే వైయస్సార్ కాంగ్రెసు పార్టీ అధ్యక్షుడు వైయస్ జగన్ కంపెనీల్లో రూ. 850 కోట్ల పెట్టుబడులు పెట్టారని సిబిఐ కోర్టుకు తెలిపింది. ఈ మేరకు ఓ తెలుగు టీవీ చానెల్ సోమవారం వార్తాకథనాన్ని ప్రసారం చేసింది. వైయస్ జగన్ అక్రమాస్తుల కేసులో అరెస్టయిన విజయ సాయి రెడ్డి బెయిల్ పిటిషన్‌పై సిబిఐ కౌంటర్ దాఖలు చేసింది. విజయ సాయి రెడ్డి జగన్ కేసులో ప్రత్యేక సూత్రధారి అని, బెయిల్ ఇస్తే సాక్ష్యాలను తారుమారు చేస్తారని వాదించింది. పూర్తి ఆధారాలు దొరగ్గానే వైయస్ జగన్ ఆస్తుల కేసులో మరింత మందిని అరెస్టు చేస్తామని తెలిపింది.

వైయస్ జగన్ జగతి పబ్లికేషన్స్ డైరెక్టర్‌గా ఉన్నప్పుడే క్విడ్ ఫ్రోకు పునాది పడిందని, ఆరోపించింది. జగన్ కుటుంబానికి సన్నిహితుడు కాబట్టే విజయసాయి రెడ్డి టిటిడి బోర్డు డైరెక్టర్ అయ్యారని ఆరోపించింది. సండూరు పవర్‌కు చెందిన కిలాన్ టెక్నాలజీకి విజయసాయి రెడ్డి భార్య డైరెక్టర్‌గా ఉన్నారని చెప్పింది. విజయసాయి రెడ్డి ఓరియంటల్ బ్యాంక్ డైరెక్టర్‌గా ఉన్నప్పుడు ఓ కంపెనీకి రూ. 200 కోట్ల రూపాయల రుణం ఇప్పించారని, అదే తర్వాత జగన్‌కు చెందిన భారతి సిమెంట్స్‌గా మారిందని చెప్పింది. వైయస్ జగన్ అక్రమ వ్యాపారం 2002 - 2003లో ప్రారంభమైందని, దానికి విజయ సాయి రెడ్డే కారకుడని సిబిఐ ఆరోపించినట్లు ఓ టీవీ చానెల్ వార్తాకథనాన్ని ప్రసారం చేసింది. విజయసాయి రెడ్డి జ్యుడిషియల్ రిమాండ్‌ను కోర్టు ఈ నెల 16వ తేదీ వరకు పొడగించింది. అలాగే ఆయన బెయిల్ పిటిషన్‌పై విచారణను కూడా 16వ తేదీకి వాయిదా వేసింది.

ఇదిలావుంటే, అక్రమ మైనింగ్ కేసులో గాలి జనార్దన్ రెడ్డి వ్యక్తిగత సహాయకుడు అలీఖాన్‌ను సిబిఐ తన కస్టడీలోకి తీసుకుంది. గాలి జనార్దన్ రెడ్డిని, అలీఖాన్‌ను బెంగళూర్‌లోని కార్యాలయంలో సిబిఐ అధికారులు విచారిస్తున్నారు.

English summary

According to a Telugu news channel- CBI has revealed that YSR allocated 20 thousand acres of land to few people, in return they invested Rs 850 crores in YS Jagan companies.