సమైక్యాంధ్రే, అలా కాని పక్షంలో 'గ్రేటర్': టిజి వెంకటేష్

By Srinivas

Published: Friday, March 30, 2012, 13:38 [IST]

హైదరాబాద్: రాష్ట్ర విభజనపై చిన్న నీటి పారుదల శాఖ మంత్రి టిజి వెంకటేష్ మరో రెండు ప్రతిపాదనలు తెర పైకి తీసుకు వచ్చారు. ఆయన విభజన అంశంపై శుక్రవారం విలేకరులతో మాట్లాడారు. మా మొదటి ప్రాధాన్యత సమైక్యాంధ్రనే అని ఆయన చెప్పారు. ఒకవేళ ఖచ్చితంగా విభజన చేయాల్సి వస్తే గ్రేటర్ రాయలసీమను డిమాండ్ చేస్తామన్నారు. రాయల తెలంగాణ, రాయల కోస్తా పైన చర్చించాల్సిన ఆవశ్యకత ఉందని చెప్పారు. మూడో ప్రత్యామ్నాయం అంగీకరించమన్నారు.

త్వరలో జరగనున్న ఉప ఎన్నికల తర్వాత కాంగ్రెసు పార్టీ అధిష్టానం వైఖరిలో మార్పు రావొచ్చునని అన్నారు. తెలంగాణ సెంటిమెంట్‌తో తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, మీడియా పేరుతో వైయస్సార్ కాంగ్రెస్ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ముందుకు వెళుతున్నారని విమర్శించారు. తెలంగాణ, మీడియానే కెసిఆర్, జగన్ బలం అన్నారు.

Published On March 30, 2012