సిబిఐ టార్గెట్ వైయస్సార్: వైయస్ జగన్ సాక్షి డైలీ

By Pratap

Published: Sunday, April 1, 2012, 9:57 [IST]

హైదరాబాద్: సిబిఐ తన చార్జిషీట్‌లో దివంగత నేత వైయస్ రాజశేఖర రెడ్డిని టార్గెట్ చేసిందని వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి చెందిన సాక్షి దినపత్రిక ఆరోపించింది. చార్జిచీట్ అనే శీర్షికతో ఆ పత్రిక ఓ వార్తాకథనాన్ని ప్రచురించింది. రూ. 16 కోట్ల లబ్ధికి రూ. 30 కోట్ల ప్రతిఫలమట అంటూ వ్యంగ్యంగా వ్యాఖ్యానించింది. ఆనాడు ఈనాడు దినపత్రికలో ఏం రాశారో ఇప్పటి సిబిఐ చార్జిషీట్‌లో అదే ఉందంటూ వ్యాఖ్యానించింది. దానికి జీవోలతో సహా తాము నాడే సమాధానం ఇచ్చినా సిబిఐ పట్టించుకోలేదని విమర్శించింది. మరణించిన వ్యక్తి ఎలాగూ రాలేరనే వైయస్ రాజశేఖర రెడ్డిపై నిందలు వేస్తున్నారని, నేరుగా అభాండాలు వేస్తున్నారని సాక్షి దినపత్రిక ఆరోపించింది.

కోర్టుకు రాసిన లేఖ నుంచి కోర్టుకిచ్చిన అభియోగం వరకు అంతా కుట్రేనని, ఇది తొమ్మిది నెలల కుట్ర అని సాక్షి వ్యాఖ్యానించింది. ఎన్ని నిందలు మోపినా వైయస్ వచ్చి సమాధానం చెప్పుకోలేరని, ఎల్లో మీడియాకైనా, సిబిఐకైనా అదే ధైర్యమని అన్నది. వైయస్ రాజశేఖర రెడ్డి నిండు సభలో ఎదురొడ్డి తిప్పి కొట్టిన విపక్షాల విమర్శలన్నిటినీ సిబిఐ తన చార్జిషీట్‌లో పొందుపరిచిందని చెప్పింది. ఈ కేసులో సిబిఐ తేల్చేదేమీ లేదని, ఈ కేసును ఇంకా కొన్నాళ్లు సాగదీసి బురద చల్లే కార్యక్రమాన్ని మాత్రం ఎల్లో ఫెలోల సాయంతో కొనసాగిస్తారని స్పష్టమవుతోందని, ఈ దర్యాప్తు రిమోట్ ఢిల్లీలోనే ఉందని తేలుతోందని సాక్షి దినపత్రిక దుయ్యబట్టింది.

Published On April 1, 2012