రేప్ చేస్తే ధర్నాలొద్దన్న మంత్రి, మహిళల దేహశుద్ది

By Srinivas

Published: Wednesday, August 29, 2012, 11:04 [IST]

ముంబయి: మహారాష్ట్ర నీటి సరఫరా, పారిశుద్ధ్య శాఖ మంత్రి లక్ష్మణ్ రావ్ దోబ్లే వివాదాస్పద వ్యాఖ్యలు చేశారు. అత్యాచారానికి గురైన దళిత మహిళలకు మద్దతుగా ఆందోళన, ర్యాలీలు చేయడం వల్ల సమయం వృథా అవుతుందే తప్ప ప్రయోజనం లేదని, చట్టాలు ఉన్నప్పటికీ మేమేమీ చేయలేమని, అందుకే సదరు మహిళలు, అలా పుట్టే పిల్లలను పెంచి, న్యాయ విద్య చదివించి, నిందితులకు శిక్షపడేలా చేయడమే ఉత్తమమని వ్యాఖ్యానించారు. అయితే ఈ వ్యాఖ్యలపై మండిపడ్డ మహిళలు అతనికి దేహశుద్ధి చేశారు. దీంతో అతను కిక్కురుమనకుండా అక్కడ నుండి వెళ్లిపోయారు.

ఆదివారం 4వ రాష్ట్రస్థాయి అన్నాబావ్ సాతే సాహిత్య సమ్మేళన్ ముగింపులో మంత్రి మాట్లాడారు. మహిళలపై వేధింపులు నే అంశంపై ఆయన ప్రసంగిస్తూ.. అత్యాచార బాధితుల కోసం ధర్నాలు, ఇతర నిరసన కార్యక్రమాలు చేపట్టడానికి తాను పూర్తిగా వ్యతిరేకమని, అలా చేస్తే కేసు తీవ్రత తగ్గిపోయే ప్రమాదముందని, బాధితుల పక్షాన ర్యాలీలు, ధర్నాలు అవసరం లేదని అన్నారు.

అంతేకాకుండా గర్భం దాల్చిన మహిళలు చిన్నారులకు జన్మనిచ్చి వారి భవిష్యత్తుపై దృష్టి సారించాలని సూచించారు. ఆయన ప్రసంగం ముగించుకొని వెళ్లిపోయేందుకు సిద్ధమైన సమయంలో అతివలు అతనికి దేహశుద్ధి చేశారు. ఆయన తప్పించుకొని పోయి కారెక్కి ఉడాయించారట. అయితే దీనిపై ఎలాంటి ఫిర్యాదు పోలీసులకు అందలేదని తెలుస్తోంది.

Published On August 29, 2012