కన్నడనాట లోకాయుక్తగా కరీంనగర్ జస్టిస్ భాస్కరరావ్

బెంగళూరు: కర్నాటక లోకాయుక్తగా జస్టిస్ భాస్కర రావు గురువారం ఉదయం ప్రమాణ స్వీకారం చేశారు. రాష్ట్ర గవర్నర్ భరద్వాజ్ ఆయనచే ప్రమాణ స్వీకారం చేయించారు. భాస్కర రావు గతంలో కర్నాటక హైకోర్టుకు చీఫ్ జస్టిస్‌గా పని చేశారు. శివరాజ్ పాటిల్ రాజీనామా చేయడంతో భాస్కర రావును లోకాయుక్తగా నియమించారు. భాస్కర రావును లోకాయుక్తగా నియమిస్తూ కర్ణాటక ప్రభుత్వం బుధవారం ఆదేశాలు జారీ చేసింది. ఈ రోజు ఆయన ప్రమాణ స్వీకారం చేశారు.

ఈ నియామకంపై కర్ణాటక న్యాయవాదుల సంఘాలు పెద్దఎత్తున అభ్యంతరాలు వ్యక్తం చేశాయి. ఆయనకు కన్నడ భాష రాదని ఆరోపించాయి. ఈ అభ్యంతరాలను రాష్ట్ర ప్రభుత్వం పట్టించుకోలేదు. ఆంధ్రప్రదేశ్‌లోని కరీంనగర్ జిల్లాకు చెందిన జస్టిస్ భాస్కర రావు సమర్థుడైన, నిజాయితీపరుడైన న్యాయమూర్తిగా పేరుప్రఖ్యాతులు పొందారు. పదహారు నెలలుగా కర్ణాటక లోకాయుక్త పదవి ఖాళీగా ఉంది.

అంతకుముందు శివరాజ్ పాటిల్ లోకాయుక్తగా ఉన్నారు. అతను సెప్టెంబర్ 2011లో రాజీనామా చేశారు. చాలా రోజుల తర్వాత లోకాయుక్తగా జస్టిస్ భాస్కర రావు నియమితులయ్యారు. ప్రభాకర రావు కరీంనగర్ జిల్లాలోని కాల్వశ్రీరాంపూర్ మండలానికి చెందినవారు. ఆయన 1999 జనవరి 17న కర్ణాటక హైకోర్టు తాత్కాలిక న్యాయమూర్తిగా నియమితులయ్యారు. అదే ఏడాది మార్చి 9న ప్రధాన న్యాయమూర్తి బాధ్యతలు చేపట్టి 2000 జూన్ 26న పదవీ విరమణ చేశారు.

ఉస్మానియా విశ్వవిద్యాలయంలో ఎల్ఎల్‌బి పూర్తి చేసిన భాస్కర రావు రాష్ట్ర హైకోర్టు జడ్జిగా పదోన్నతిని పొందారు. తరువాత కర్ణాటక ప్రధాన న్యాయమూర్తిగా బాధ్యతలను నిర్వర్తించారు. 2002 అక్టోబర్‌లో రాష్ట్ర మానవ హక్కుల కమిటీ చైర్మన్‌గా, మెడికల్ కమిటీ చైర్మన్‌గానూ వ్యవహరించారు. 2003 అక్టోబర్‌లో కేంద్ర మానవ హక్కుల సంఘం సభ్యులుగా నియమితులై 2008 జూన్ వరకు కొనసాగారు.

English summary

Justice Bhaskar Rao, on Thursday, took over as the Karnataka Lokayukta. Justice Rao, who is a former CJ of Karnataka High Court, was sworn in by governor HR Bharadwaj.