గవర్నర్, సిఎం: హోలీ హోలీల రంగహోలీ (పిక్చర్స్)

By Pratap

Published: Wednesday, March 27, 2013, 20:09 [IST]

హైదరాబాద్: రాష్ట్ర వ్యాప్తంగా ప్రజలు హోలీ పండుగ సందర్భంగా రంగుల్లో మునిగి తేలారు. బుధవారంనాడు ప్రజలు ఆనందోత్సాహాల మధ్య పండుగను నిర్వహించుకున్నారు. పరస్పరం రంగులు చల్లుకుంటూ తమ ప్రేమానురాగాలను వ్యక్తం చేసుకున్నారు. హైదరాబాదులో రంగుల పండుగ ఆనందోల్లాసాల మధ్య జరిగింది. అయితే, నీటి కొరత హైదరాబాదీలపై ప్రభావం చూపింది.

నిరుటి కన్నా హైదరాబాదులో రంగుల పండుగ కాస్తా కళ తప్పినట్లు కనిపించింది. రాష్ట్ర రాజకీయ నాయకులు, ప్రముఖులు కూడా రంగుల్లో మునిగితేలారు. యువతీయువకులు రంగులు చల్లుకుంటూ నృత్యాలు చేస్తూ ఆనందంగా గడిపారు.

గవర్నర్ నరసింహన్, ముఖ్యమంత్రి కిరణ్ కుమార్ రెడ్డి రంగుల హోలీని ఆనందించారు. ముఖ్యమంత్రిపై లంబాడీ స్త్రీలు రంగులు చల్లారు. గవర్నర్ నరసింహన్ పిల్లలతో రంగులు ఆడారు. గవర్నర్ దంపతులు రాజభవన్‌లో ఆనంద సముద్రంలో తేలియాడారు. పలువురు రాజకీయ ప్రముఖులు కూడా గవర్నర్‌ను అభినందించడానికి రంగుల్లో తేలియాడారు.