AP SIR: "సర్ " లో ఓటు పోయిందా ? ఇలా చేయండి- ఆగస్టు 30 వరకే..!

ఆంధ్రప్రదేశ్ లో కేంద్ర ఎన్నికల సంఘం చేపట్టిన ప్రత్యేక ఓటర్ల జాబితాల సవరణ కార్యక్రమం ( AP SIR)లో ఎన్యుమరేషన్ ప్రక్రియ పూర్తి చేసుకుని ముసాయిదా జాబితాల్ని అధికారులు విడుదల చేశారు. ఇందులో లక్షల ఓట్లు గల్లంతయ్యాయి. పలు చోట్ల పాత ఓట్లతో ప్రస్తుత ఓట్లు మ్యాప్ కాకపోవడంతో బీఎల్వోలు కూడా ఏమీ చేయలేని పరిస్ధితి. దీంతో ఆయా ఓటర్లు తమ ఓటు హక్కు కోల్పోతామనే ఆందోళనలో ఉన్నారు. ఇలాంటి వారి కోసం ఆంధ్రప్రదేశ్ ప్రధాన ఎన్నికల అధికారి కీలక ప్రకటన చేశారు.

తాజా సవరణ తర్వాత ఎన్నికల సంఘం విడుదల చేసిన ఆంధ్రప్రదేశ్ ముసాయిదా ఓటర్ల జాబితాలో పేర్లు లేని వారు ఏం చేయాలన్న దానిపై ప్రధాన ఎన్నికల అధికారి క్లారిటీ ఇచ్చారు. వీరంతా మూడు విధాలుగా తిరిగి దరఖాస్తు చేసుకునేందుకు అవకాశం కల్పించారు. ఇందులో ఫామ్ 6 (భారతీయులకు) లేదా ఫామ్ 6ఏ (ఎన్నారైలకు) ద్వారా కొత్త ఓటర్లుగా నమోదు చేసుకోవచ్చు. లేదా సవరణలు, తొలగింపులు, అభ్యంతరాల కోసం ఫామ్ 7 ద్వారా దరఖాస్తు చేసుకోవచ్చు. అలాగే చిరునామా మార్పు కోసం ఫామ్ 8 ద్వారా దరఖాస్తు చేసుకోవచ్చని తెలిపారు.

📢 ఆంధ్రప్రదేశ్ ఓటర్ల దృష్టికి! 🗳️
> డ్రాఫ్ట్ ఓటర్ల జాబితా విడుదలైంది! మీ పేరు ఉందో లేదో వెంటనే చెక్ చేసుకోండి.
> 🔹 కొత్త నమోదు: Form 6 / 6A (NRI)
> 🔹 తొలగింపులు/అభ్యంతరాలు: Form 7
> 🔹 సవరణలు/చిరునామా మార్పు: Form 8
> 🗓️ గడువు: ఆగస్టు 30, 2026 వరకు pic.twitter.com/bJH8zbszhO

— Chief Electoral Officer, Andhra Pradesh (@CEOAndhra) August 13, 2026

అయితే ఇలా దరఖాస్తులు చేసుకునేందుకు ఓటర్లకు ఆగస్టు 30 వరకూ మాత్రమే గడువు ఉంటుందని ఎన్నికల ప్రధానాధికారి తెలిపారు. ఇప్పటికే టీడీపీ, వైసీపీ సహా ప్రధాన పార్టీలన్నీ భారీ ఎత్తున ఓట్లు గల్లంతయ్యాయని, ముఖ్యంగా మ్యాపింగ్ లో పేర్లు కనిపించక చాలా మంది తమ ఓట్లు కోల్పోతున్నట్లు ఈసీ దృష్టికి తెచ్చారు. దీంతో వీరంతా మూడు విధాలుగా దరఖాస్తు చేసుకుంటే క్షేత్రస్దాయిలో వివరాలు పరిశీలించి తిరిగి ఓటు హక్కు కల్పిస్తామని ఎన్నికల ప్రధానాధికారి భరోసా కల్పిస్తున్నారు. ఇందుకోసం ఆన్ లైన్ ద్వారా దరఖాస్తు చేసుకోవాలంటే voters.eci.gov.in వెబ్ సైట్ ద్వారా, లేదా ECINET మొబైల్ యాప్ ద్వారా కూడా అవకాశం ఉందని తెలిపారు. ఇలా పూర్తి చేసిన దరఖాస్తుల్ని జూలై 31 నుంచి ఆగస్టు 30 వరకూ సంబంధిత బీఎల్వోలు లేదా ఈఆర్వోలు, లేదా ఏఈఆర్వోలకు సమర్పించే అవకాశం కల్పిస్తున్నారు.