మేమే నెం.1: మైసూరా, బాబు పరిస్థితి తెలుసు: కొండ్రు

By Srinivas

Published: Wednesday, July 24, 2013, 16:38 [IST]

హైదరాబాద్: తాను రాష్ట్రంలో ఇప్పటికీ నెంబర్ వన్‌గానే ఉన్నామని వైయస్సార్ కాంగ్రెసు పార్టీ సీనియర్ నేత మైసూరా రెడ్డి బుధవారం అన్నారు. తొలి దశ పంచాయతీ ఎన్నికల ఫలితాలపై ఆయన స్పందించారు. తమది ప్రజల అభిమానంతో నిలబడిన పార్టీ అన్నారు. పంచాయతీ ఎన్నికలు పార్టీ రహితంగా జరిగేవన్నారు. అంతా అయ్యాక తెలుగుదేశం, కాంగ్రెసు పార్టీ నేతలు సవాళ్లు విసురుతున్నారని విమర్శించారు.

ఈ ఎన్నికలు తమకు కొలబద్ద కాదన్నారు. తాము మసిపూసి మారేడుకాయ చేసే రకం కాదన్నారు. తొలి దశ పంచాయతీ ఎన్నికల ద్వారా ఎక్కడైనా లోటుపాట్లు ఉంటే సరిదిద్దుకుంటామని చెప్పారు. రాష్ట్రంలో తాము ఇప్పటికీ నెంబర్ వన్ అని, ప్రజల మద్దతు తమకే ఉందన్నారు. స్తానిక సంస్థల ఎన్నికలు ఎప్పుడు బలోపేతం చేస్తారని ప్రశ్నించారు. సర్వేలు వాస్తవానికి దూరంగా ఉన్నాయని అన్నారు. రాష్ట్రంలో కాంగ్రెసు పార్టీ పరపతి పడిపోయిందని చెప్పిన సర్వేలు.. అదే పార్టీ నెంబర్ వన్ అంటూ చెప్పడం ఎలా సాధ్యమన్నారు.

కాంగ్రెసు మెజార్టీ స్థానాలు గెలుస్తుంది: రౌతు

మూడు విడతల పంచాయతీ ఎన్నికలలో కాంగ్రెసు పార్టీయే ఆధిక్యంలో నిలుస్తుందని కాంగ్రెసు ఎమ్మెల్యే రౌతు సూర్యప్రకాశ్ రావు అన్నారు. తొలి విడత పంచాయతీ ఎన్నికలలో టిడిపి స్వల్ప ఆధిక్యంలో ఉందని, అయినా ఏకగ్రీవాలతో కలిపి కాంగ్రెస్సే ముందుందన్నారు. ముఖ్యమంత్రి కిరణ్ కుమార్ రెడ్డి సొంత జిల్లాలో తక్కువ స్థానాలు వచ్చాయని విమర్శించడం సరికాదన్నారు.

బాబు పరిస్థితేంటో సర్వేలు చెబుతున్నాయి: కొండ్రు

తెలుగుదేశం పార్టీ పరిస్థితి ఏమిటో జాతీయ సర్వేలు చెబుతున్నాయని మంత్రి కొండ్రు మురళి అన్నారు. బాబుకు గోబెల్స్ ప్రచారం అలవాటే అన్నారు. 2004, 2009కు ముందు కూడా ఇలాగే ప్రచారం చేశారన్నారు. పంచాయతీ ఎన్నికల్లో అత్యధిక స్థానాల్లో గెలిచింది తమ వారే అన్నారు.

Published On July 24, 2013