త్వరలో టిపై నిర్ణయం: బొత్స, డ్రామాలొద్దని జగన్ పార్టీకి

By Srinivas

Published: Friday, July 26, 2013, 13:54 [IST]

న్యూఢిల్లీ/హైదరాబాద్: తెలంగాణపై నిర్ణయం చెప్పేందుకే తమ పార్టీ అధిష్టానం ఈ సమావేశాలు నిర్వహిస్తోందని, వైయస్సార్ కాంగ్రెసు పార్టీ డ్రామాలు ఆపాలని ప్రదేశ్ కాంగ్రెసు కమిటీ అధ్యక్షుడు, రవాణా శాఖ మంత్రి బొత్స సత్యనారాయణ శుక్రవారం అన్నారు. కాంగ్రెసు పార్టీ వార్ రూమ్‌లో ఆంధ్ర ప్రదేశ్ రాష్ట్ర కాంగ్రెస్ పార్టీ వ్యవహారాల పర్యవేక్షకులు దిగ్విజయ్ సింగ్, కేంద్రమంత్రి గులాం నబీ ఆజాద్‌తో భేటీ అనంతరం బొత్స మీడియాతో మాట్లాడారు.

తెలంగాణపై కాంగ్రెసు త్వరలో నిర్ణయం తీసుకుంటుందని చెప్పారు. త్వరలో తెలంగాణపై కాంగ్రెసు పార్టీ వర్కింగ్ కమిటీ సమావేశాలు ఉంటాయన్నారు. వైయస్సార్ కాంగ్రెసు పార్టీ రాజీనామాలతో డ్రామాలు ఆడుతోందన్నారు. వారు డ్రామాలు ఆపి తెలంగాణపై తమ పార్టీ వైఖరి చెప్పాలని డిమాండ్ చేశారు. ప్రాంతీయ పార్టీలకు రాజీనామాలతో పనేమిటని ప్రశ్నించారు. ఆ పార్టీలోనే స్పష్టమైన వైఖరి లేదన్నారు. త్వరలో తమ పార్టీ విధానం చెబుతామన్నారు.

పొంగులేటి ఫైర్

తెలంగాణ విషయంలో తెలుగుదేశం పార్టీ అధ్యక్షుడు నారా చంద్రబాబు నాయుడు గోడమీది పిల్లిలా వ్యవహరిస్తున్నారని, వైయస్సార్ కాంగ్రెసు పార్టీ నిజ స్వరూపం బయటపడిందని కాంగ్రెసు పార్టీ సీనియర్ నేత పొంగులేటి సుధాకర్ రెడ్డి న్యూఢిల్లీలో అన్నారు. కాగా సీమాంద్ర నేతల భేటీకి కేంద్రమంత్రులు పురంధేశ్వరి, పనబాక లక్ష్మి, కిల్లి కృపారాణి హాజరు కాలేదు.

విచ్చిన్నం చేస్తే ఊరుకోం: బైరెడ్డి

రాయలసీమను విచ్ఛిన్నం చేస్తే ఊరుకునేది లేదని రాయలసీమ పరిరక్షణ సమితి నేత బైరెడ్డి రాజశేఖర రెడ్డి అన్నారు. రాయలసీమను ముక్కలు చేస్తే వచ్చేది బ్రోకర్ల రాజ్యమన్నారు. కోస్తాంధ్ర మోసాలను భరించే స్థితిలో సీమ లేదన్నారు. సీమ తలగలబడుతుంటే తమ ప్రాంత నేతలు రోమన్ చక్రవర్తుల్లా వ్యవహరిస్తున్నారని మండిపడ్డారు.

Published On July 26, 2013