విభజనపై నిర్ణయం: సీమాంధ్రకు అదనపు బలగాలు?

హైదరాబాద్/న్యూఢిల్లీ: రాష్ట్రంలో నెలకొన్న రాజకీయ పరిణామాల నేపథ్యంలో సీమాంధ్ర ప్రాంతానికి అదనపు పోలీసు బలగాలను పంపిస్తున్నారు. దీంతోపాటు రాజధాని హైదరాబాదుకు కూడా బలగాలని రప్పిస్తున్నారు. రాష్ట్ర విభజనపై కేంద్రం తుది నిర్ణయం తీసుకోనున్న తరుణంలో అదనపు పారామిలిటరీ బలగాల తరలింపునకు రంగం సిద్ధం కావడం గమనార్హం.

సీమాంధ్ర జిల్లాలకు 15 కంపెనీలను కేటాయించగా, హైదరాబాద్ లో 10 కంపెనీలను వినియోగించనున్నారు. ఈ నేపథ్యంలో తెలంగాణపై ఏదో ఒక నిర్ణయం తథ్య మన్న సంకేతాలు బలపడుతున్నాయి. ఇక సీమాంధ్రలో ఎక్కువ బలగాలను మోహరించనుండటంతో విభజన దిశగానే నిర్ణయమా? అన్న సందేహాలూ ఊపందుకున్నాయి. రాష్ట్రానికి 25 కంపెనీల పారా మిలటరీ బలగాలను పంపాలని కేంద్ర హోంశాఖ ఉత్తర్వులు జారీచేసింది.

గురువారం డిజిపి దినేష్ రెడ్డి, హోంశాఖ కార్యదర్శి టిపి దాస్, అదనపు డిజిలు గోపాల్ రెడ్డి, తేజ్‌దీప్ కౌర్ ఢిల్లీ వెళ్లారు. రాష్ట్రంలో శాంతి భద్రతలపై వీరు కేంద్రానికి నివేదించినట్లు తెలిసింది. ప్రత్యేక, సమైక్య ఉద్యమాల నేపథ్యంలో ఎటు మొగ్గితే ఎలాంటి పరిస్థితి తలెత్తుతుందన్నదానిపై ఉన్నతాధికారులు తెలుసుకున్నట్లు సమాచారం. ఆ తర్వాత హోంశాఖ అధికారులు ముఖ్యమంత్రితో చర్చించి పారామిలిటరీ మోహరింపునకు ఏర్పాట్లు చేశారు. పంచాయతీ ఎన్నికల కోసం ఇప్పటికే 40 కంపెనీల బలగాలు రాష్ట్రంలో ఉన్నాయి.

నక్సల్స్ సమస్యపై డిజిపి

రాష్ట్రాన్ని విభజిస్తే తెలంగాణలో నక్సలైట్ల సమస్య పెరుగుతుందా? అని న్యూఢిల్లీలో డిజిపి దినేష్ రెడ్డిని విలేకరులు ప్రశ్నించగా.. వంతెన వచ్చినప్పుడే దాటుతామని, ఏదో జరిగిపోతుందని, మరోదో ఇప్పుడు ఊహించుకోవడం తగదని, ఈ ప్రశ్నే సరికాదని, సమాధానం ఇచ్చేందుకు తాను సరైన వ్యక్తినీ కాదని, రాష్ట్రంలో మావోయిస్టుల సమస్య అదుపులో ఉందని సమాధానమిచ్చారు.

English summary

It is said that paramilitary forces are being moved to the Seemandhra region to face any evenatuality.