సంక్రాంతి స్పెషల్ : కొత్త అల్లుడికి 158 వంటకాలతో విందు !

తెలుగు సంస్కృతిలో సంక్రాంతి పండుగకు - కొత్త అల్లుళ్లకు విడదీయలేని అనుబంధం ఉంది. ముఖ్యంగా ఉమ్మడి గోదావరి జిల్లాల్లో అల్లుడిని సాక్షాత్తూ లక్ష్మీనారాయణుడి స్వరూపంగా భావించి.. అత్తమామలు ఇచ్చే ఆతిథ్యం శతాబ్దాలుగా వస్తున్న ఆచారం. ప్రేమ, గౌరవం కలగలిసిన ఈ సంప్రదాయం ఇప్పుడు గుంటూరు జిల్లాలోనూ ఘనంగా ఆవిష్కృతమైంది.

అల్లుడికి గ్రాండ్ వెల్‌కమ్..

గుంటూరు జిల్లా తెనాలికి చెందిన వందనపు మురళీకృష్ణ-లక్ష్మీ దంపతులు తమ కుమార్తె మౌనికను గత ఏడాది రాజమండ్రికి చెందిన శ్రీదత్తకు ఇచ్చి వివాహం చేశారు. వివాహానంతరం అల్లుడు శ్రీదత్త తమ ఇంటికి వచ్చిన తొలి సంక్రాంతిని చిరస్మరణీయం చేయాలని అత్తమామలు నిర్ణయించుకున్నారు. రాజమండ్రి అల్లుడికి, రాజమండ్రిని మించిన మర్యాదను అందించి ఫుల్ వైరల్ అవుతున్నారు.

158 రకాల ఘుమఘుమలు..

ఈ విందులో అత్తమామలు ఏకంగా 158 రకాల వంటకాలతో అల్లుడిని ముంచెత్తారు. ఇందులో అరిసెలు, బూరెలు, గారెలు, బొబ్బట్లు వంటి సంప్రదాయ పిండివంటలే కాకుండా.. అనేక రకాల స్వీట్లు, కారాలు, పచ్చళ్లు, వెరైటీ భోజన పదార్థాలు ఉన్నాయి. డైనింగ్ టేబుల్ నిండా ఈ వంటకాలను చూసి కొత్త అల్లుడే కాకుండా స్థానికులు సైతం ఆశ్చర్యం వ్యక్తం చేశారు.

దీంతో మురళీకృష్ణ నివాసం బంధుమిత్రుల రాకతో ఒక జాతరను తలపించింది. మహిళలు పిండివంటల తయారీలో నిమగ్నమవ్వగా, పిల్లలు ఆటపాటలతో సందడి చేశారు. మన సంప్రదాయాలు కేవలం ఆచారాలు మాత్రమే కాదని, అవి కుటుంబ సభ్యుల మధ్య ప్రేమను, అనుబంధాలను ఎలా పెంచుతాయో ఈ వేడుక నిరూపించింది.

మురిసిపోయిన అల్లుడు..

ఇక అత్తమామలు చూపిన ఈ అసాధారణమైన ప్రేమాభిమానాలకు శ్రీదత్త ఆనందం వ్యక్తం చేశారు. జీవితాంతం గుర్తుండిపోయేలా తనకు ఇంతటి గౌరవాన్ని ఇచ్చిన అత్తమామలకు ఆయన కృతజ్ఞతలు తెలిపారు. 'అతిథి దేవోభవ' అన్న భావన నేటి ఆధునిక కాలంలో కూడా సజీవంగా ఉండటం ఎంతో గొప్ప విషయమని కుటుంబ సభ్యులు ఆనందంగా చెప్పుకున్నారు.

అయితే గోదావరి జిల్లాలకే పరిమితమైన ఈ 'అల్లుడి విందు' సంప్రదాయం ఇప్పుడు ఇతర జిల్లాలకు కూడా విస్తరించడం విశేషంగా భావిస్తున్నారు. సంక్రాంతి అంటే కేవలం పంటల పండుగ మాత్రమే కాదు, తరతరాలుగా వస్తున్న విలువలని, బంధుత్వాలని కలిపి ఉంచే ఒక వారధి అని ఈ ఘటన మరోసారి చాటిచెప్పింది.

English summary

In Telugu culture, there is an inseparable connection between the Sankranti festival and new sons-in-law. Vandanapu Muralikrishna and Lakshmi, a couple from Tenali in Guntur district, gave a grand welcome to their new son-in-law who came home for the first time on Sankranti.