పాస్ పోర్ట్ వెరిఫికేషన్, క్లియరెన్స్ లో దేశంలోనే ఏపీ టాప్- వరుసగా రెండోసారి...

దేశంలో పాస్ పోర్ట్ ధృవపత్రాల తనిఖీ, పాస్ పోర్టుల జారీలో ఆంధ్రప్రదేశ్ మరోసారి అగ్రస్ధానంలో నిలిచింది. ఇప్పటికే 2018-19 సంవత్సరానికి పాస్ పోర్టు వెరిఫికేషన్ లో బెస్ట్ స్టేట్ గా అవార్డు అందుకున్న ఏపీ.. 2019-20 సంవత్సరానికి మరోసారి అగ్రస్దానంలో నిలిచి అవార్డు సొంతం చేసుకుంది.

పాస్ పోర్టు వెరిఫికేషన్ ప్రక్రియలో నిబంధనలు పాటిస్తున్నారా లేదా, ధృవపత్రాల తనిఖీలు నిజాయితీగా చేస్తున్నారా లేదా, ఎంత సమయంలో ఈ ప్రక్రియ పూర్తి చేస్తున్నారు, పాస్ పోర్టుల జారీపై ప్రజల నుంచి ఫిర్యాదులు వస్తున్నాయా లేదా వంటి అంశాలను పరిగణనలోకి తీసుకుని ఏటా విదేశీ వ్యవహారాలశాఖ ఈ అవార్డులను ప్రకటిస్తోంది.

దేశవ్యాప్తంగా పలు రాష్ట్రాల్లో ఓ ప్రహసనంగా సాగే పాస్ పోర్టుకు అవసరమైన ధృవపత్రాల తనిఖీ, వాటి క్లియరెన్స్ విషయంలో ఏపీ మాత్రం ఎంతో ముందుంది. ప్రజలకు అత్యుత్తమ రీతిలో పాస్ పోర్టు సేవలను అందిస్తున్నందుకు గానూ విదేశీ వ్యవహారాలశాఖ వరుసగా రెండో ఏడాది ఏపీని ఈ అవార్డుకు ఎంపిక చేసింది.

ప్రజలకు అత్యుత్తమ పాస్ పోర్టు సేవలు అందిస్తున్న ఏపీ పోలీసు విభాగానికి సీఎం జగన్ అభినందనలు తెలిపారు. ఆంధ్రప్రదేశ్ ప్రజలకు మెరుగైన సేవలను అందించేందుకు పోలీస్ శాఖ మరింతగా సన్నద్ధంగా ఉంటుందని డీజీపీ గౌతం సవాంగ్ ఈ సందర్బంగా తెలిపారు.

English summary

andhra pradesh bags best passport verification and clearance award for the year 2019-20. cm jagan congratulated the state police for standing first consecutive second time