Kacheguda–Visakhapatnam Train: రేపు కాచిగూడ నుంచి విశాఖ వెళ్తున్నారా ? ఇది మీకోసమే..!

హైదరాబాద్ నుంచి విశాఖకు రేపు (శుక్రవారం) వెళ్లే ప్రయాణికుల కోసం దక్షిణ మధ్య ఓ ప్రత్యేక రైలు నడుపుతోంది. ప్రస్తుతం వేసవి నేపథ్యంలో ప్రయాణికుల సంఖ్య అంతకంతకూ పెరుగుతోంది. దీంతో రైళ్లలో అస్సలు బెర్తులు ఖాళీగా ఉండటం లేదు. ఈ రద్దీని దృష్టిలో ఉంచుకుని దక్షిణ మధ్య రైల్వే ఎప్పటికప్పుడు ప్రత్యేక రైళ్లను అందుబాటులోకి తెస్తోంది. ఇదే క్రమంలో రేపు కాచిగూడ స్టేషన్ నుంచి విశాఖకు ఓ ప్రత్యేక రైలు (Kacheguda-Visakhapatnam Special Train) నడపాలని నిర్ణయించింది.

కాచిగూడలో ఈ ప్రత్యేక రైలు 07810 రాత్రి 8.45కు బయలుదేరుతుంది. ఈ రైలు ఎల్లుండి ఉదయం 9.30 గంటలకు విశాఖపట్నం చేరుకుంటుంది. ఇది కేవలం వన్ వే ట్రైన్. ఈ రైలుకు మల్కాజ్ గిరి, చర్లపల్లి, కాజీపేట, వరంగల్, రాయనపాడు, ఏలూరు, రాజమండ్రి, సామర్ల కోట స్టేషన్లలో మాత్రమే పరిమిత స్టాప్ లు ఇచ్చారు. మిగిలిన స్టేషన్లలో స్టాప్ లు ఉండవు. కాబట్టి ఈ విషయాన్ని గమనించి ప్రయాణికులు టికెట్లు బుక్ చేసుకోవాల్సి ఉంటుంది.\

ఈ ప్రత్యేక రైలులో స్లీపర్, జనరల్ సెకండ్ క్లాస్ బోగీలు మాత్రమే ఉంటాయి. కాబట్టి రేపు శుక్రవారం అత్యవసర ప్రయాణాలు చేసే వారికి ఈ రైలు ఉపయోగపడనుంది. ఈ రైలుతో పాటు మరికొన్ని ఇప్పటికే ప్రకటించిన రైళ్లు సైతం హైదరాబాద్-విశాఖ మధ్య అందుబాటులో ఉన్నాయి. వాటీలో టికెట్లు దొరకని వారు ఇందులో బుక్ చేసుకోవచ్చు. వేసవి నేపథ్యంలో ప్రయాణికుల డిమాండ్ పెరుగుతున్న తరుణంలో విశాఖ వంటి దూర ప్రాంతానికి వెళ్లే ప్రయాణికులకు ఇది కచ్చితంగా ఉపయోగపడనుంది.