టీడీపీ ఎమ్మెల్యేకి బిగ్ షాక్.. ఆస్తుల స్వాధీనం చేసుకోవాలని కోర్టు తీర్పు !

కడప కోర్టు ఇచ్చిన సంచలన తీర్పుతో టీడీపీ ఎమ్మెల్యేకి బిగ్ షాక్ తగిలింది. అప్పు చెల్లించడంలో విఫలమైన కారణంగా.. ప్రొద్దుటూరు టీడీపీ ఎమ్మెల్యే నంద్యాల వరదరాజులరెడ్డి ఆస్తులను స్వాధీనం చేసుకోవాలని న్యాయస్థానం ఆదేశించింది. ఈ తీర్పు కేవలం ఎమ్మెల్యేకే కాకుండా, ఆయన కుమారుడు కొండారెడ్డికి కూడా వర్తిస్తుందని స్పష్టం చేసింది. దీంతో ఈ వ్యవహారం ఆంధ్రప్రదేశ్ రాజకీయ వర్గాల్లో తీవ్ర చర్చనీయాంశంగా మారింది.

అసలేం జరిగిందంటే..?

నంద్యాల కొండారెడ్డికి చెందిన రాధా కన్‌స్ట్రక్షన్స్‌ కంపెనీ.. హైదరాబాద్‌కు చెందిన పృథ్వీ అసెట్ రీకన్‌స్ట్రక్షన్ అండ్ సెక్యూరిటైజేషన్ కంపెనీ లిమిటెడ్ నుంచి అప్పు తీసుకుంది. ఈ అప్పును తిరిగి చెల్లించడంలో విఫలం కావడంతో, పృథ్వీ కంపెనీ కడప కోర్టును ఆశ్రయించింది. కేసును విచారించిన కోర్టు, గోపవరం పంచాయతీలోని సర్వే నంబర్ 670/ఏ1సీ1లో ఉన్న రెండు ఎకరాల స్థలం (కామిశెట్టి కాలేజీ)ని స్వాధీనం చేసుకోవాలని తీర్పు ఇచ్చింది. కోర్టు ఆదేశాల ప్రకారం ఈ ఆస్తిని పృథ్వీ కంపెనీకి అప్పగించాలి.

అడ్వకేట్ కమిషనర్ ఆధ్వర్యంలో ప్రక్రియ..

ఈ ఆస్తుల స్వాధీన ప్రక్రియను అడ్వకేట్ కమిషనర్ ఇండ్ల రూబెన్ ఆధ్వర్యంలో ఈ నెల 16న, మంగళవారం ఉదయం 10 గంటలలోపు పూర్తి చేయాలని కోర్టు స్పష్టమైన ఆదేశాలు జారీ చేసింది. రాధా కన్‌స్ట్రక్షన్స్‌ కంపెనీలో ఎమ్మెల్యే వరదరాజులరెడ్డితో పాటు, బద్వేలి శ్రీనివాసులరెడ్డి, మీనా, నంద్యాల కొండారెడ్డి వంటి పలువురు సభ్యులుగా ఉన్నారు. ఈ ఆస్తిని స్వాధీనం చేసుకోవడం ద్వారా అప్పు ఇచ్చిన సంస్థకు న్యాయం జరగనుంది.

అయితే అధికార పార్టీ ఎమ్మెల్యేపై కోర్టు ఈ తరహా సంచలన తీర్పు ఇవ్వడం రాష్ట్ర రాజకీయాల్లో ఆసక్తికరమైన చర్చకు దారితీసింది. ఈ పరిణామాలపై ఎమ్మెల్యే వరదరాజులరెడ్డి సహ ఆయన కుటుంబం ఎలా స్పందిస్తారోనని ఆసక్తి నెలకొంది.

English summary

TDP MLA got a big shock with the sensational verdict given by the Kadapa court. The court ordered the seizure of the properties of Proddutur TDP MLA Nandyala Varadarajula Reddy due to his failure to repay the loan.