అడ్డుకోగలిగాం: సబ్బం హరి, సోనియా గాంధీ అసహనం!

న్యూఢిల్లీ: పార్లమెంటు శీతాకాల సమావేశాల్లో తెలంగాణ బిల్లును రానివ్వకుండా తాము అడ్డుకోగలిగామని కాంగ్రెసు పార్టీ అమలాపురం శాసన సభ్యులు సబ్బం హరి బుధవారం అన్నారు. లోకసభ వాయిదా పడిన అనంతరం ఆయన ఢిల్లీలో విలేకరులతో మాట్లాడారు.

రాష్ట్ర విభజనపై కేంద్రం తీసుకున్న నిర్ణయాన్ని వ్యతిరేకిస్తూ తాము ప్రవేశ పెట్టిన అవిశ్వాస తీర్మానానికి డెబ్బై నుండి 80 మంది సభ్యుల మద్దతు లభించిందన్నారు. సభాపతి ముందు అనేక విషయాలను లేవనెత్తామన్నారు. ప్రజలు జరుగుతున్న విషయాలను గమనిస్తున్నారని, ఇక ప్రభుత్వానికి వ్యతిరేకంగా తాము ప్రజలలోకి వెళ్తామని చెప్పారు. విభజనపై కేంద్రం వైఖరిని ప్రజల ముందు ఉంచుతామన్నారు.

సోనియా అసహనం!

లోకసభలో లోక్‌పాల్ బిల్లు పైన చర్చ జరుగుతున్న సమయంలో సీమాంధ్ర కాంగ్రెసు పార్లమెంటు సభ్యులు సమైక్యాంధ్రకు అనుకూలంగా నినాదాలు చేశారు. నిరసన మధ్యనే లోక్‌పాల్ బిల్లుకు ఆమోదం లభించిన విషయం తెలిసిందే. సభ్యులు జోరుగా నినాదాలు చేస్తుండటంతో ఏఐసిసి అధ్యక్షురాలు అసహనానికి లోనయ్యారు. అక్కడే ఉన్న కేంద్రమంత్రి కమల్‌నాథ్‌ను... ఇదంతా ఏమిటని ప్రశ్నించారట కూడా.

అంతకుముందు లోకసభ ప్రతిపక్ష నేత సుష్మా స్వారాజ్ ఎంపీల తీరుపై ఆగ్రహం వ్యక్తం చేసిన విషయం తెలిసిందే. కేంద్రానికి వ్యతిరేకంగా సొంత పార్టీ ఎంపీలే అవిశ్వాస తీర్మానం నోటీసు ఇచ్చారని, అధికారపక్ష సభ్యుల తీరుతో సభ సజావుగా సాగడం లేదన్నారు. సభలో ప్రశాంత పరిస్థితి నెలకొనేలా చర్యలు తీసుకోవాలన్నారు.

English summary

It is said that AICC president Sonia Gandhi on Wednesday expressed her unhappy on Seemandhra Congress MPs protest.