శ్రీకాకుళం వాసులకు రైల్వే గుడ్ న్యూస్- ఆ మూడు రైళ్లకు 3 కొత్త హాల్ట్ లు..!

శ్రీకాకుళం (srikakulam) వాసులకు రైల్వేశాఖ ఇవాళ ఓ గుడ్ న్యూస్ చెప్పింది. జిల్లా మీదుగా రాకపోకలు సాగిస్తున్న మూడు ప్రధాన రైళ్లకు మూడు స్టేషన్లలో కొత్తగా హాల్ట్ లు ఇస్తూ నిర్ణయం తీసుకుంది. జిల్లాకు చెందిన కేంద్రమంత్రి రామ్మోహన్ నాయుడు విజ్ఞప్తి మేరకు రైల్వేశాఖ ఈ నిర్ణయం తీసుకుంది. ఎంతోకాలంగా చేసిన ప్రయత్నాల ఫలితంగా, శ్రీకాకుళం జిల్లాలో ప్రయాణించే మూడు ముఖ్యమైన రైళ్లకు ఇప్పుడు కీలక స్టేషన్లలో రైల్వే శాఖ హల్ట్ లు మంజూరు చేశారని రామ్మోహన్ తెలిపారు.

ఇందులో 58505/06 గుణుపూర్-విశాఖపట్నం ప్యాసింజర్ రైలుకు హరిశ్చంద్రపురం వద్ద కొత్తగా హాల్ట్ ఇచ్చారు. అలాగే
1825/26 బెరహంపూర్-విశాఖపట్నం ప్యాసింజర్ రైలుకు మందస రోడ్ వద్ద కొత్తగా హాల్ట్ ఇచ్చారు. వీటితో పాటు 18117/18 రాజ్య రాణి ఎక్స్‌ప్రెస్ రైలుకు పాతపట్నం స్టేషన్ వద్ద కొత్తగా హాల్ట్ ఇచ్చారు. ఈ హల్ట్ ల ద్వారా జిల్లాలోని అంతర్గత ప్రాంతాలకు రవాణా సౌకర్యం మరియు విశాఖపట్నం వంటి ప్రధాన పట్టణాలకు విద్య, వైద్యం, ఉపాధి, వ్యాపార అవసరాల కోసం ప్రయాణం మరింత సులభమవుతుందన్నారు.

ఈ మేరకు తన అభ్యర్థనకు సానుకూలంగా స్పందించిన ప్రధాని నరేంద్ర మోదీకి, రైల్వే మంత్రి అశ్విని వైష్ణవ్ కు శ్రీకాకుళం జిల్లా ప్రజల తరఫున హృదయపూర్వక కృతజ్ఞతలు తెలియజేస్తున్నట్లు రామ్మోహన్ నాయుడు తెలిపారు. ఈ కొత్త స్టాపేజీల ద్వారా జిల్లాలోమెరుగైన రైల్వే కనెక్టివిటీ, ఉత్తరాంధ్ర ప్రాంత అభివృద్ధికి కొత్త అవకాశాలను తీసుకువస్తుందన్నారు. శ్రీకాకుళం జిల్లాలో ప్రతి ప్రాంతానికీ అభివృద్ధి చేరేలా మౌలిక వసతులను బలోపేతం చేసే దిశగా ఇది మరో ముఖ్యమైన అడుగు అని ఆయన అభివర్ణించారు.