పకోడిగాడు, యదవ..: రాంగోపాల్ వర్మపై వంగవీటి రాధా తిట్ల దండకం

ప్రముఖ సినీ దర్శకుడు రాంగోపాల్ వర్మపై వంగవీటి రాధకృష్ణ తీవ్రస్థాయిలో మండిపడ్డారు.

Updated: Monday, December 26, 2016, 13:21 [IST]

విజయవాడ: ప్రముఖ సినీ దర్శకుడు రాంగోపాల్ వర్మపై వంగవీటి రాధకృష్ణ తీవ్రస్థాయిలో మండిపడ్డారు. డబ్బు కోసం వంగవీటి జీవితచరిత్రను కించపర్చేలా చిత్రీకరించి గొప్పలు చెప్పుకుంటున్నారని ఆరోపించారు. డబ్బు కావాలని అడిగితే రంగా అభిమానులు చందాలు వేసుకుని ముఖాన కొట్టేవాళ్లమన్నారు.

సోమవారం ఉదయం వంగవీటి రంగా వర్ధంతి సందర్భంగా ఆయన విగ్రహానికి పూలమాల వేసిన రాధాకృష్ణ నివాళులర్పించారు. తన తండ్రి ఆశయ సాధన కోసం కృషిచేస్తానని ఆయన స్పష్టం చేశారు. రంగాను హత్య చేసిన వాళ్లు దర్జాగా తిరుగుతున్నా కనిపించడం లేదా అని ప్రశ్నించారు.

అన్నీ తెలుసంటూ కోతలు కోసిన వర్మ.. డబ్బు కోసం తన తండ్రి జీవితాన్ని కించపరిచారని, ఇందుకు ఆయన మూల్యం చెల్లించుకోక తప్పదని వంగవీటి రాధ హెచ్చరించారు. అంతేగాక, పకోడిగాడు సినిమా తీశాడు, ఆ యదవ గురించి మాట్లాడుకోవాల్సిన అవసరం లేదంటూ తీవ్ర వ్యాఖ్యలు చేశారు.

vangaveeti radha fires at Ramgopal verma

వర్మ మూల్యం చెల్లించుకుంటారని, అందుకు టైమ్ వస్తుందని చెప్పారు. అది అందరికీ తెలుస్తుందని అన్నారు. రంగ అంటే ఎలాంటి నాయకుడో అందరికీ తెలుసని, ఒకరు చెప్పాల్సిన అవసరం లేదని అన్నారు.

కాగా, ఇప్పటికే వంగవీటి సినిమాపై రంగా అభిమానులు హెచ్చార్సీలో ఫిర్యాదు చేశారు. కాపుల మనోభావాలను కించపరిచేలా 'వంగవీటి' సినిమాను చిత్రీకరించారని రంగా అభిమానులు తమ ఫిర్యాదులో పేర్కొన్నారు. సినిమా టైటిల్ తోపాటు కాపులను కించపరిచే సన్నివేశాలను వెంటనే తొలగించాలని పేర్కొన్నారు.

వర్మ దిష్టిబొమ్మ దహనం

'వంగవీటి' చిత్రంలో వంగవీటి రంగా కుటుంబీకులను కించపరిచేలా అభ్యంతరకర సన్నివేశాలు ఉన్నాయని నిరసిస్తూ పశ్చిమగోదావరి జిల్లా తణుకులో కాపు సంఘ నాయకులు, కార్యకర్తలు, వంగవీటి రంగా అభిమానులు ఆందోళన చేపట్టారు. సినిమా ప్రదర్శిస్తున్న లక్ష్మీ థియేటర్‌ వద్ద దర్శకుడు రామ్‌గోపాల్‌వర్మ దిష్టిబొమ్మ దహనం చేశారు.

రంగా 28వ వర్థంతి సందర్భంగా ఆయన విగ్రహానికి నేతలు పాలాభిషేకంచేసి, పూలమాలలు వేసి నివాళులర్పించారు. రంగా కుటుంబీకులను కించపరిచేలా సినిమా తీసిన రామ్‌గోపాల్‌వర్మ క్షమాపణ చెప్పాలని వారు డిమాండ్‌ చేశారు.