విశాఖ-చర్లపల్లి ఎక్స్ ప్రెస్ లో కీలక మార్పు-ఇకపై ఇలా..!

ఏపీలోని విశాఖపట్నం (visakhapatnam) నుంచి తెలంగాణలోని చర్లపల్లికి రాకపోకలు సాగిస్తున్న ప్రత్యేక ఎక్స్ ప్రెస్ రైలులో తూర్పు కోస్తా రైల్వే మార్పు చేసింది. ఇప్పటివరకూ ప్రత్యేక రైలుగా నడుపుతున్న ఈ ఎక్స్ ప్రెస్ ను కాస్తా రెగ్యులర్ రైలుగా మార్చింది. ఈ మార్పు ఎప్పటి నుంచి అమల్లోకి రాబోతోంది, హాల్ట్ లు ఎలా ఉంటాయి, ఏయే కోచ్ లు ఉంటాయన్న వివరాలను తూర్పు కోస్తా రైల్వే విడుదల చేసింది. ఈ వివరాలు ఇలా ఉన్నాయి.

విశాఖపట్నం నుంచి చర్లపల్లికి వెళ్లే ఎక్స్ ప్రెస్ రైలు (నం.18527)ను ఏప్రిల్ 3 నుంచి రెగ్యులర్ ఎక్స్ ప్రెస్ రైలుగా మార్చారు. ప్రతీ శుక్రవారం ఈ రైలు అందుబాటులో ఉంటుంది. అలాగే చర్లపల్లి నుంచి విశాఖకు నడుపుతున్న మ్యాచింగ్ రైలు (నం.18528)ను కూడా రెగ్యులర్ సర్వీస్ గా మార్చారు. ఈ రైలు ఏప్రిల్ 4 నుంచి ప్రతీ శనివారం అందుబాటులో ఉంటుంది. ఈ రెండు రైళ్లకూ 12 హాల్ట్ లు ఇచ్చారు. వాటి వివరాలు ఇలా ఉన్నాయి.

విశాఖపట్నం-చర్లపల్లి వీక్లీ ఎక్స్ ప్రెస్ రైలుకు దువ్వాడ, అనకాపల్లి, యలమంచిలి, తుని, అన్నవరం, సామర్లకోట, రాజమండ్రి, ఏలూరు, రాయనపాడు, ఖమ్మం, వరంగల్, కాజీపేటలో హాల్ట్ లు ఇచ్చారు. విశాఖలో సాయంత్రం 5.30కు బయలుదేరే రైలు మరుసటి రోజు ఉదయం 8గంటలకు చర్లపల్లి చేరుకుంటుంది. అలాగే చర్లపల్లిలో మధ్యాహ్నం 2.30కు బయలుదేరే రైలు మరుసటి రోజు ఉదయం 5.20కు విశాఖపట్నం చేరుకుంటుంది. ఈ రెండు రైళ్లలోనూ నాలుగు జనరల్ కోచ్ లు, ఆరు స్లీపర్ కోచ్ లు, థర్డ్ ఏసీ ఎకానమీ కోచ్ లు 4, సెకండ్ ఏసీ కోచ్ 1, ధర్డ్ ఏసీ కోచ్ 1 ఉంటాయి. వీటితో పాటు దివ్యాంగుల కోచ్ కూడా ఉంటుంది.