పూచీకత్తు లేకుండానే రుణాలు! కోవిడ్ కాలం నాటి స్కీమ్ మళ్లీ
అంతర్జాతీయ సరిహద్దుల్లో యుద్ధ మేఘాలు కమ్ముకుంటున్న వేళ, భారత ఆర్థిక వ్యవస్థపై దాని ప్రభావం పడకుండా కేంద్ర ఆర్థిక మంత్రిత్వ శాఖ అప్రమత్తమైంది. ఇరాన్ సంఘర్షణల వల్ల దెబ్బతిన్న ఎగుమతి రంగాలు, సూక్ష్మ, చిన్న, మధ్య తరహా పరిశ్రమల (MSME) కోసం సుమారు రూ.2 లక్షల కోట్లకు పైగా విలువైన ప్రత్యేక సహాయ ప్యాకేజీని ప్రభుత్వం సిద్ధం చేస్తోంది. రాబోయే 15 రోజుల్లోనే ఈ పథకం పట్టాలెక్కే అవకాశం ఉంది
కరోనా మహమ్మారి సమయంలో దేశీయ పరిశ్రమలను ఆదుకున్న 'ఎమర్జెన్సీ క్రెడిట్ లైన్ గ్యారెంటీ స్కీమ్' (ECLGS) ఎంతటి విజయాన్ని సాధించిందో మనందరికీ తెలిసిందే. ఇప్పుడు అదే తరహాలో ఇరాన్ ఉద్రిక్తతల ప్రభావిత రంగాల కోసం కొత్త పథకాన్ని ఆర్థిక సేవల విభాగం ఖరారు చేస్తోంది. దీని ద్వారా ఎటువంటి పూచీకత్తు (Collateral) లేకుండానే MSMEలకు రుణాలు అందుతాయి. వీటికి ప్రభుత్వం పూర్తి హామీ ఇవ్వడం విశేషం.
ఎగుమతి రంగాలకు ప్రాణవాయువు..
ప్రస్తుతం ప్రపంచ వాణిజ్య మార్గాల్లో అంతరాయాలు కలగడం వల్ల ఎగుమతి ఆధారిత పరిశ్రమలపై ఒత్తిడి పెరుగుతోంది. ముఖ్యంగా నగదు ప్రవాహం (Cash Flow)పై ఆధారపడే చిన్న పరిశ్రమలు వడ్డీ రేట్ల పెరుగుదలకు గురయ్యే ప్రమాదం ఉంది. ఈ తరుణంలో ప్రభుత్వం అందించే ద్రవ్యత్వ మద్దతు (Liquidity Support) ఆయా రంగాలకు ప్రాణవాయువులా మారుతుందని నిపుణులు విశ్లేషిస్తున్నారు.
MSME ల కోసం ముందస్తు జాగ్రత్త చర్యగా..
ప్రస్తుతానికి వ్యవస్థాగతంగా తక్షణ ఒత్తిడి ఏమీ లేదని అధికారులు చెబుతున్నప్పటికీ, భవిష్యత్తులో పరిస్థితి దిగజారితే ఎదుర్కోవడానికి ప్రభుత్వం ఈ 'ముందస్తు జాగ్రత్త' (Precautionary Measure) ప్యాకేజీని సిద్ధం చేస్తోంది. భౌగోళిక రాజకీయ ఉద్రిక్తతలు తగ్గినప్పటికీ, సరఫరా గొలుసు పునరుద్ధరణకు సమయం పట్టే అవకాశం ఉన్నందున ఈ నిర్ణయం తీసుకున్నట్లు తెలుస్తోంది.
గతంలో ECLGS ద్వారా లక్షలాది మంది చిన్న వ్యాపారులు లబ్ధి పొంది తమ ఉనికిని చాటుకున్నారు. ఇప్పుడు ఈ కొత్త రూ.2 లక్షల కోట్ల ప్యాకేజీ కూడా అదే స్థాయిలో భారతీయ పరిశ్రమలకు అండగా నిలుస్తుందని పారిశ్రామిక వర్గాలు ఆశాభావం వ్యక్తం చేస్తున్నాయి.
Click it and Unblock the Notifications
Sign in with Google