వామ్మో 126 శాతం సుంకాలు, భారత సోలార్ ఉత్పత్తులపై ఉక్కుపాదం

భారతీయ సౌర ఇంధన రంగం (Solar Sector) బుధవారం స్టాక్ మార్కెట్‌లో తీవ్ర ఒడిదుడుకులకు లోనైంది. భారతీయ సోలార్ సెల్స్, ప్యానెళ్ల ఎగుమతులపై అమెరికా వాణిజ్య విభాగం సుమారు 126 శాతం భారీ 'కౌంటర్‌వైలింగ్ సుంకాలను' (CVD) విధిస్తూ ప్రాథమిక నిర్ణయం తీసుకోవడం ఇన్వెస్టర్లలో ఆందోళన రేకెత్తించింది.

ఈ వార్తతో మార్కెట్ ప్రారంభంలోనే సోలార్ రంగ షేర్లు కుప్పకూలాయి. అయితే, ప్రముఖ సౌర ఇంధన సంస్థ 'వారీ ఎనర్జీస్' (Waaree Energies) ఇచ్చిన కీలక వివరణతో నష్టాలు కొంతమేర తగ్గుముఖం పట్టాయి. బుధవారం ఉదయం ట్రేడింగ్‌లో వారీ ఎనర్జీస్ షేరు ఏకంగా 10.6 శాతం క్షీణించి ₹2,701.9 వద్ద ట్రేడయ్యింది. ఒక దశలో ఇది లోయర్ సర్క్యూట్‌ను తాకినప్పటికీ, ఆ తర్వాత పుంజుకుంది.

మరో ప్రముఖ సంస్థ 'ప్రీమియర్ ఎనర్జీస్' షేర్లు కూడా ప్రారంభంలో భారీగా పడిపోయి, ఆ తర్వాత 4.9 శాతం నష్టానికి పరిమితమయ్యాయి. సోలెక్స్ ఎనర్జీ 6 శాతం, విక్రమ్ సోలార్ 4.5 శాతం నష్టపోగా.. బోరోసిల్ రెన్యూవబుల్స్ వంటి కొన్ని సంస్థలు మాత్రం స్వల్ప లాభాలను గడించాయి.

Solar ప్రభావం పరిమితమే - హితేష్ దోషి:

యూఎస్ సుంకాల ప్రభావంపై వారీ ఎనర్జీస్ ఛైర్మన్ హితేష్ దోషి స్పష్టతనిచ్చారు. అమెరికా విధించిన ఈ సుంకాలు కేవలం 'భారత్‌లో తయారైన సోలార్ సెల్స్'కు మాత్రమే వర్తిస్తాయని, ఇతర దేశాల నుంచి సెల్స్‌ను దిగుమతి చేసుకుని భారత్‌లో ప్యానెళ్లుగా అసెంబుల్ చేసిన ఉత్పత్తులకు వర్తించవని ఆయన స్పష్టం చేశారు. ప్రస్తుతం భారత తయారీదారులు ఇతర దేశాల నుంచి తక్కువ ధరకే సెల్స్‌ను దిగుమతి చేసుకుంటున్నారని, కాబట్టి అమెరికా నిర్ణయం వల్ల భారత ఎగుమతులపై పెద్దగా ప్రభావం ఉండదని ఆయన వివరించారు. అమెరికాకు జరిగే మొత్తం సోలార్ దిగుమతుల్లో భారతీయ సెల్స్ వాటా కేవలం 4 శాతమేనని, ఇది సుమారు 600 నుంచి 1,000 మెగావాట్ల ఎగుమతులకు మాత్రమే పరిమితమవుతుందని ఆయన పేర్కొన్నారు.

ముందున్న 'డంపింగ్' సవాలు:

అన్యాయమైన ప్రభుత్వ సబ్సిడీలను సాకుగా చూపి అమెరికా ఈ చర్యలకు దిగింది. అయితే, ఇది ప్రాథమిక నిర్ణయం మాత్రమే. వచ్చే నెలలో 'డంపింగ్' (వస్తువులను అతి తక్కువ ధరకు విక్రయించడం)పై అమెరికా తుది నిర్ణయం వెలువరించనుంది. ఒకవేళ అక్కడ కూడా ప్రతికూల ఫలితాలు వస్తే, భారతీయ కంపెనీలు తమ ఎగుమతి వ్యూహాలను మార్చుకోవాల్సి ఉంటుంది. ప్రస్తుతం భారతీయ సోలార్ సెల్స్‌కు దేశీయంగానే విపరీతమైన డిమాండ్ ఉన్నందున, ఎగుమతులపై ఆంక్షలు వచ్చినా సంస్థల ఆదాయానికి పెద్దగా గండం ఉండకపోవచ్చని విశ్లేషకులు భావిస్తున్నారు.

English summary

Indian solar stocks like Waaree Energies and Premier Energies faced high volatility on Feb 25 after the US imposed 126% duties. Waaree's chairman clarifies that the impact remains limited to locally made cells.