ఎందుకా ఏడుపు, బండి సంజయ్‌పై కవిత విసుర్లు

తెలంగాణలో టీఆర్ఎస్ వర్సెస్ బీజేపీ మధ్య డైలాగ్ వార్ జోరుగా సాగుతోంది. ఇరు పార్టీల నేతలు మాటలతో కత్తులు దూసుకుంటున్నారు. బీజేపీ, బండి సంజయ్ లక్ష్యంగా ఎమ్మెల్సీ కవిత ఫైరయ్యారు. కామారెడ్డి జిల్లా నాగిరెడ్డి పేట మండలం తాండూరులో టీఆర్ఎస్ కార్యకర్తల ఆత్మీయ సమావేశంలో ఆమె పాల్గొన్నారు. బీజేపీకి ఓ సిద్ధాంతం అంటూ లేదని, వారు ఎప్పుడూ ప్రజల్లో లేరని దుయ్యబట్టారు.

భయపడబోం..

బీజేపీ ఏం చేసినా తెలంగాణ ప్రజలు భయపడబోరని కవిత తేల్చి చెప్పారు. తమ నేతలు చట్టబద్ధంగానే వ్యాపారాలు చేసుకుంటున్నారని స్పష్టంచేశారు. అధికారులు వచ్చి అడిగితే పత్రాలు ఇస్తామని, చూసుకుని వెళ్లాలని అన్నారు. బండి సంజయ్ యాదగిరిగుట్ట వెళ్లి దొంగ ప్రమాణాలు చేశారని ఫైరయ్యారు. నిన్న ఓ సభలో ఏకంగా ఏడ్చేశారని, ఎందుకు ఏడ్చారో తెలియదని సెటైర్లు వేశారు.

అరెస్ట్ చేయొద్దా..?

ఎమ్మెల్యేల కొనుగోలు కేసులో దొరికిన బీజేపీ జాతీయ ప్రధాన కార్యదర్శి బీఎల్ సంతోష్‌ను అరెస్ట్ చేయొద్దని బండి సంజయ్ అంటున్నారని ఆగ్రహం వ్యక్తం చేశారు. ఆయన కోసం కోర్టుకు కూడా వెళ్లారని గుర్తు చేశారు. విచారణకు కూడా రానని సంతోష్ అంటున్నారని పేర్కొన్నారు. టీఆర్ఎస్ మంత్రులు ఏ దర్యాప్తు సంస్థ పిలిచినా వెళుతున్నారని.. వారీ పక్షాన ఏ తప్పు లేదని చెప్పారు.

గద్దల్లా వచ్చి తన్నుకుపోవాలని..

టీఆర్ఎస్ పార్టీ నేతలను గద్దల్లా వచ్చి తన్నుకుపోవాలని బీజేపీ చూస్తోంది తప్పితే, వారికి మరో లక్ష్యం లేదని కవిత ఫైరయ్యారు. రాముడి పేరు చెప్పడం, రౌడీయిజం చేయడం తప్ప ఆ పార్టీకి మరో పని లేదని విమర్శించారు. బీజేపీకి ఓ అబద్ధాల వాట్సాప్ వర్సిటీ ఉందని కవిత విరుచుకుపడ్డారు. అందులో అన్నీ అబద్ధాలే చెబుతారని ఫైరయ్యారు.

ఖర్గేతో కవిత

ఇటీవల కవిత అర్వింద్‌పై విరుచుకుపడ్డ సంగతి తెలిసిందే. ఖర్గేతో కవిత మాట్లాడారని అర్వింద్ కామెంట్ చేయగా.. కవిత ఫైరయ్యారు. చెప్పుతో కొడతా అని విరుచుకుపడ్డారు. తర్వాత అర్వింద్ ఇంటిపై టీఆర్ఎస్ నేతలు దాడి చేసిన సంగతి తెలిసిందే. ఈ ఇష్యూ హాట్ టాపిక్ అయ్యింది.

English summary

trs mlc kavitha slams telangana bjp state president bandi sanjay.