చిచ్చు పెట్టిన సింగం: బీజేపీకి గుడ్‌బై: ఎన్డీఏ నుంచి బయటికి..!!

చెన్నై: తమిళనాడు రాజకీయాల్లో పెను ప్రకంపనలు చోొటు చేసుకున్నాయి. అనూహ్య పరిణామాలు సంభవించాయి. ప్రధానమంత్రి నరేంద్ర మోదీ సారథ్యంలో కేంద్రంలో అధికారంలో ఉన్న బీజేపీ- ఎన్డీఏ సంకీర్ణ ప్రభుత్వంలో భాగస్వామిగా ఉంటూ వచ్చిన ఏఐఏడీఎంకే కీలక నిర్ణయాన్ని తీసుకుంది. కూటమికి గుడ్‌బై చెప్పింది. బీజేపీతో తెగదెంపులు చేసుకుంది. ఎన్డీఏ నుంచి బయటికి వచ్చింది.

ఈ మేరకు చెన్నైలోని పార్టీ కేంద్ర కార్యాలయంలో ఏర్పాటైన సర్వసభ్య సమావేశంలో తీర్మానాన్ని ఆమోదించింది. ఈ తీర్మానాన్ని పార్టీకి చెందిన ఏ ఒక్క సభ్యుడు కూడా అభ్యంతరం వ్యక్తం చేయకపోవడం ప్రాధాన్యతను సంతరించుకుంది. ఏకగ్రీవంగా ఈ తీర్మానాన్ని ఆమోదించారు వారంతా.

బీజేపీ- ఎన్డీఏ కూటమి నుంచి బయటికి రావాలంటూ ఏఐఏడీఎంకే నిర్ణయం తీసుకోవడానికి కారణం లేకపోలేదు. బీజేపీ తమిళనాడు రాష్ట్రశాఖ అధ్యక్షుడు, మాజీ ఐపీఎస్ అధికారి అన్నామలై చేసిన వ్యాఖ్యలు- ఈ రెండు పార్టీల మధ్య చిచ్చు పెట్టింది. ఈ వ్యాఖ్యల పట్ల క్షమాపణ చెప్పాలంటూ ఏఐఏడీఎంకే డిమాండ్ చేసినప్పటికీ.. ఆయన పట్టించుకోలేదు. దీనితో ఈ నిర్ణయం తీసుకుంది అన్నా డీఎంకే.

తమిళనాడు మొట్టమొదటి ముఖ్యమంత్రి, ద్రవిడ ఐకాన్ సీఎన్ అన్నాదురై.. హిందూమతాన్ని, సనాతన ధర్మాన్ని కించపరిచేలా వ్యాఖ్యలు చేశారంటూ ఆరోపించారు అన్నామలై. 1956లో మధురైలో జరిగిన బహిరంగ సభలో ఈ వ్యాఖ్యలు చేశారని పేర్కొన్నారు. ఈ వ్యాఖ్యల అనంతరం అన్నాదురై మధురైలో ఆశ్రయం పొందారని, క్షమాపణలు సైతం చెప్పారని అన్నామలై ఆరోపించారు.

ఈ వ్యాఖ్యలు తమిళనాడు రాజకీయాల్లో పెను దుమారాన్ని రేపాయి. దీనిపై బీజేపీ మిత్రపక్షం ఏఐఏడీఎంకే కూడా అభ్యంతరాన్ని వ్యక్తం చేసింది. అన్నాదురైను అవమానించాడని, దీనిపై బహిరంగంగా క్షమాపణ చెప్పాలంటూ డిమాండ్ చేసింది. అయినప్పటికీ- అన్నామలై పట్టించుకోలేదు.

దీనితో బీజేపీ- ఎన్డీఏ నుంచి బయటికి రావాలని ఏఐఏడీఎంకే నిర్ణయించింది. ఈ మేరకు పార్టీ సర్వసభ్య సమావేశంలో దీనికి సంబంధించిన తీర్మానాన్ని ఏకగ్రీవంగా ఆమోదించింది. ఈ తీర్మానం ఆమోదం పొందగానే ఏఐఏడీఎంకే కార్యకర్తలు పార్టీ కార్యాలయం వద్ద పెద్ద ఎత్తున బాణాసంచా కాల్చి సంబరాలు చేసుకున్నారు.

#WATCH | Tamil Nadu | AIADMK workers burst crackers in Chennai after the party announces breaking of all ties with BJP and NDA from today. pic.twitter.com/k4UXpuoJhj

— ANI (@ANI) September 25, 2023

తమిళనాడు అసెంబ్లీతో పాటు 2019 లోక్‌సభ ఎన్నికల్లో ఏఐఏడీఎంకే- బీజేపీ కలిసి పోటీ చేసిన విషయం తెలిసిందే. ఈ రెండు ఎన్నికల్లోనూ ఈ మిత్రపక్షాలకు చుక్కెదురైంది. డీఎంకే- కాంగ్రెస్ క్లీన్ స్వీప్ చేసింది. అసెంబ్లీ ఎన్నికల్లోనూ ఇవే తరహా ఫలితాలు వచ్చిన విషయం తెలిసిందే. తమిళనాడులో మొత్తం 39 లోక్‌సభ స్థానాలు ఉండగా.. 2019 నాటి ఎన్నికల్లో బీజేపీ గెలిచింది ఒకే ఒక్కటి.

English summary

AIADMK unanimously passed a resolution in the meeting. AIADMK is breaking all ties with BJP and NDA from today.