ఇదీ భారత వైమానిక దళం సత్తా! ఆగ్రా ఎక్స్ ప్రెస్ హైవేపై యుద్ధవిమానాల విన్యాసాలు!
ఆగ్రాలోని ఎక్స్ ప్రెస్ హైవేపై యుద్ధవిమానాల విన్యాసాలు ప్రారంభమయ్యాయి.
లక్నో: ఆగ్రాలోని ఎక్స్ ప్రెస్ హైవేపై యుద్ధవిమానాల విన్యాసాలు ప్రారంభమయ్యాయి. బోయింగ్, ఎయిర్ బస్, జెట్ ఫైటర్, కార్గో ఇలా వివిధ రకాల విమానాలు ఎక్స్ ప్రెస్ హైవేపై దిగడం ఆగ్రా పరిసరాల్లోని స్థానికులను ఆశ్చర్యానికి గురిచేసింది.
యుద్ధ సమయాల్లో అత్యవసర సేవల సమయంలో విమానాలు రోడ్డుపై కిందికి దిగేందుకు వీలుగా ఇక్కడి జాతీయ రహదారులను తీర్చిదిద్దారు. ఈ నేపథ్యంలో ప్రయోగాత్మకంగా తొలిసారి నడిరోడ్డుపై యుద్ధ విమానాలు ఈ విన్యాసాలు చేశాయి.
చూసేందుకు పోటీపడ్డ స్థానికులు...
మంగళవారం తెల్లవారుజామున ప్రముఖ పర్యాటక ప్రాంతమైన ఆగ్రా దగ్గర ఢిల్లీ-లక్నో జాతీయ ఎక్స్ ప్రెస్ హైవేపై యుద్ధవిమానాలు విన్యాసాలు ప్రారంభమయ్యాయి. వీటిని చూసేందుకు స్థానికులు రోడ్డుకిరువైపులా బారులుతీరారు.
జాతీయ రహదారులపై కూడా ల్యాండింగ్...
ఈ ఎక్స్ ప్రెస్ హైవే స్పూర్తితో దేశంలోని వివిధ జాతీయ రహదారులను విమాన రన్ వేలుగా తీర్చిదిద్దే ఆలోచనలో కేంద్ర ప్రభుత్వం ఉంది. యుద్ధం లాంటి అత్యవసర సమయాల్లో ఈ రోడ్డు రన్ వేలు చాలా ఉపయోగపడతాయని ఇండియన్ ఎయిర్ ఫోర్స్ అధికారులు తెలిపారు.
తొలిసారిగా సూపర్ హెర్క్యులెస్...
ఈ యుద్ధ విన్యాసాల్లో భాగంగా తొలిసారిగా ఓ సూపర్ హెర్క్యులెస్ ఎయిర్ క్రాఫ్ట్ ఎక్స్ ప్రెస్ హైవే పై ల్యాండ్ అయింది. ఈ యుద్ధ విమానం దాదాపు 200 మంది కమాండోలను మోసుకెళ్లగలదు. 2010లో భారత వైమానిక దళంలో చేరిన ఈ రకం యుద్ధవిమానాల ధర ఒక్కోటి రూ.900 కోట్లు.
విన్యాసాల్లో జాగ్వార్, మిరాజ్, సుఖోయ్...
మంగళవారం నాటి విన్యాసాల్లో 3 జాగ్వార్ యుద్ధ విమానాలు, ఆరు మిరాజ్ 2000 యుద్ధవిమానాలు, 3 సుఖోయ్ 30ఎంకేఐ యుద్ధ విమానాలు పాల్గొన్నాయి. గగన వీధుల్లో విహరిస్తూ, విచిత్రమైన విన్యాసాలు ప్రదర్శిస్తూ భారత వైమానిక దళం సామర్థ్యాన్ని ఇవి దర్పణం పడుతూ వీక్షకులకు అమితానందాన్ని కలుగజేశాయి.
గతంలోనూ...
భారతీయ వైమానిక దళానికి ఈ రకం విన్యాసాలు కొత్తేం కాదు. 2015 మే నెలలో ఒకసారి ఎయిర్ ఫోర్స్ అధికారులు ఈ విన్యాసాన్ని ప్రదర్శించారు. ఢిల్లీ సమీపంలో యమున ఎక్స్ ప్రెస్ హైవేపై మిరాజ్ 2000 యుద్ధ విమానాన్ని సురక్షితంగా దించారు. ఆ తరువాత 2016 నవంబర్ లో కూడా ఆగ్రా-లక్నో ఎక్స్ ప్రెస్ హైవేపై మిరాజ్ 2000 యుద్ధవిమానంతోపాటు సుఖోయ్ యుద్ధ విమానాన్ని కూడా దించి, టేకాఫ్ తీసుకున్నారు.