20 నిమిషాలకే పెళ్లి బ్రేక్: అత్తారింట్లో అడుగుపెట్టిన వెంటనే విడాకులు!

ఉత్తరప్రదేశ్‌లోని డియోరియా జిల్లాలో ఓ ఆశ్చర్యకరమైన సంఘటన వెలుగు చూసింది. పెళ్లి జరిగిన మరుసటి రోజు అత్తారింటికి వచ్చిన పెళ్లికూతురు కేవలం 20 నిమిషాలు కూడా ఉండకుండానే భర్తతో కలిసి ఉండటానికి నిరాకరించింది. వెంటనే పుట్టింటికి వెళ్లాలనే ఆమె పట్టుదలతో గంటల తరబడి పంచాయతీ జరిగింది. చివరకు పెళ్లి రద్దయ్యింది.

అసలేం జరిగిందంటే.. భలుఅని నగర పంచాయతీ ప్రాంతానికి చెందిన యువకుడికి సలేంపూర్ నగర పంచాయతీకి చెందిన యువతితో వివాహం నిశ్చయమైంది. నవంబర్ 25న డియోరియాలోని ఓ మ్యారేజ్ హాల్‌కు వరుడి బరాత్ వచ్చింది. వధువు తరపువారు ఘనంగా స్వాగతం పలికారు. ద్వారపూజ, జైమాల సహా హిందూ సంప్రదాయాల ప్రకారం వివాహం ఘనంగా జరిగింది.

అత్తవారింటికి వెళ్లగానే పంతం
మరుసటి రోజు ఉదయం నవంబర్ 26న పెళ్లికూతురు అత్తవారింటికి చేరుకుంది. మహిళలు ఆమెను లోపలికి తీసుకెళ్లి 'ముఖం చూసే' కార్యక్రమాన్ని ప్రారంభించారు. సరిగ్గా ఆ సమయంలోనే పెళ్లికూతురు ఒక్కసారిగా బయటకు వచ్చి అత్తవారింట్లో ఉండటానికి ససేమిరా నిరాకరించింది. వెంటనే పుట్టింటి వారిని పిలిపించాలని పట్టుబట్టింది. వరుడి తరఫువారు, భర్త ఎంతగా నచ్చజెప్పడానికి ప్రయత్నించినా ఆమె తన నిర్ణయాన్ని మార్చుకోలేదు. కొంత సమయం తర్వాత వధువు తల్లిదండ్రులు కూడా అక్కడికి చేరుకున్నారు. దాదాపు 5 గంటల పాటు పంచాయతీ జరిగిన తర్వాత పెళ్లికూతురు 'అత్తవారింటి వారి ప్రవర్తన' నచ్చలేదని కారణం చెబుతూ భర్తతో కాపురం చేయనని తెగేసి చెప్పింది.

పరస్పర అంగీకారంతో విడిపోయిన దంపతులు
చివరికి జరిగిన పంచాయతీలో ఇరుపక్షాలు ఒకరికొకరు ఇచ్చిన సామాను, బహుమతులు తిరిగి ఇచ్చేయాలని నిర్ణయించుకున్నారు. ఆ తర్వాత వధువు తన కుటుంబ సభ్యులతో కలిసి పుట్టింటికి వెళ్లిపోవడంతో వారి వివాహ బంధం తెగిపోయింది. భలుఅని పోలీసు స్టేషన్ ఇన్‌ఛార్జ్ ప్రదీప్ పాండే మాట్లాడుతూ, ఈ విషయం డయల్ 112కు చేరినప్పటికీ, స్టేషన్‌లో ఎలాంటి కేసు నమోదు కాలేదని తెలిపారు. పంచాయతీలోనే ఇరుపక్షాలు పరస్పర అంగీకారంతో విడిపోయారని చెప్పారు.

English summary

A shocking incident from Uttar Pradesh’s Deoria where a bride refused to stay at her in-laws’ house just 20 minutes after arrival. After hours of discussions, both families mutually agreed to annul the marriage.