కరోనాలోనూ తగ్గనిజోరు-బిలియనర్ల జాబితాలోకి భారతీయులు-ఆక్స్ ఫామ్ రిపోర్ట్ వెల్లడి

Updated: Monday, January 17, 2022, 18:48 [IST]

దేశవ్యాప్తంగా రెండేళ్లుగా కరోనా ప్రభావం చూపుతోంది. కరోనా సంక్షోభంతో దేశ విదేశాలు అల్లాడుతున్నాయి. భారత్ పైనా కరోనా ప్రభావం తీవ్రంగా ఉంది. అయినా భారత్ నుంచి బిలీయనీర్లు పుట్టుకొస్తూనే ఉన్నారు. కరోనా సమయంలో భారత్ ఎక్కువ మంది బిలీయనీర్లను ప్రపంచానికి అందించింది. ఈ వివరాలను తాజాగా వెలువడిన గ్లోబల్ ఆక్స్ ఫామ్ దావోస్ నివేదిక 2022 వెల్లడించింది. ఈ నివేదికలో పలు సంచలన అంశాలున్నాయి.

గ్లోబల్ ఆక్స్ ఫామ్ రిపోర్ట్ 2022

భారతదేశం కోవిడ్ ప్రభావానికి తీవ్రంగా ప్రభావితమైన దేశాల్లో ఒకటి. కోవిడ్-19 సంక్షోభం సమయంలో దేశంలోని అత్యంత సంపన్నులు తమ అదృష్టాన్ని రెట్టింపు చేసుకున్నారు. ఇది దేశాన్ని నాశనం చేసి పేదరికాన్ని మరింత దిగజార్చిందని అంతర్జాతీయ సంస్ధలు గగ్గోలు పెడుతున్నాయి. అలాగే ప్రభుత్వం తన సంపదను పంపిణీ చేయడానికి విధానాలను పునఃపరిశీలించాలని ప్రపంచ ఆక్స్‌ఫామ్ దావోస్ నివేదిక 2022 తాజాగా పేర్కొంది. గతేడాది కరోనా సెకండ్ వేవ్, ఆరోగ్య మౌలిక సౌకర్యాలను టార్గెట్ చేసి శ్మశానాలను నింపేస్తున్న సమయంలో మన దేశం 40 మంది బిలియనీర్లను కాస్తా 142కి చేర్చింది. వారు దాదాపు 720 బిలియన్ డాలర్ల సంపదను కలిగి ఉన్నట్లు తేలింది. జనాభాలో పేదలు 40% కంటే ఎక్కువగా ఉందని తాజాగా వెలువడిన ఈ నివేదిక పేర్కొంది.

అన్నీ పెరిగాయ్

కరోనా మహమ్మారి ప్రభావం చూపిన సమయంలో స్టాక్ ధరల నుంచి క్రిప్టో కరెన్సీ, వస్తువుల వరకు ప్రతిదాని విలువ పెరగడంతో ప్రపంచవ్యాప్తంగా సంపద పెరిగింది. బ్లూమ్‌బెర్గ్ బిలియనీర్స్ ఇండెక్స్ ప్రకారం, ప్రపంచంలోని 500 మంది ధనవంతులు గతేడాది తమ నికర విలువలకు కనీసం ట్రిలియన్ డాలర్ల కంటే ఎక్కువే జోడించినట్లు తేలింది. భారతదేశంలో గత మేలో పట్టణ నిరుద్యోగం 15% పెరిగగా.. ఆహార అభద్రత మరింత దిగజారింది, ఇప్పుడు ఫ్రాన్స్, స్వీడన్, స్విట్జర్లాండ్‌ల కంటే ఎక్కువ మంది బిలియనీర్లు భారత్ లో ఉన్నట్లు ఆక్స్ ఫామ్ నివేదిక చెబుతోంది.

పెరుగుదలకు కారణాలివే

2016లో సంపద పన్ను రద్దు, కార్పొరేట్ లెవీల్లో భారీగా కోతలు, పరోక్ష పన్నుల పెంపుతో సహా పలు విధానాలు సంపన్నులను ధనవంతులుగా మార్చడంలో సహాయపడిన అంశాలలో ఉన్నాయి, అయితే 2020 నుంచి చూసుకుంటే జాతీయ కనీస వేతనం రోజుకు రూ. 178 ($2.4)గా ఉంది. ఆరోగ్యం, విద్యా రంగాలలో పెరుగుతున్న ప్రైవేటీకరణల మధ్య స్థానిక పాలనకు కేంద్రం నిధులు తగ్గించడం అసమానతలను మరింత పెంచిందని తాజా నివేదిక చెబుతోంది. ప్రపంచంలోని పోషకాహార లోపం ఉన్న వారిలో నాలుగింట ఒక వంతు మంది భారత్ లోనే నివసిస్తున్నారని ప్రపంచ ఆహార కార్యక్రమాన్ని ఉటంకిస్తూ ఆక్స్‌ఫామ్ రిపోర్ట్ తెలిపింది.

ధనిక విధానాలు

కేంద్రం యొక్క పన్నుల విధానం ధనవంతులకు అనుకూలమైనదిగా ఉండటమే కాకుండా, ఇది రాష్ట్రాలకు ముఖ్యమైన ఆర్థిక వనరులను కూడా కోల్పోయేలా చేస్తోందని ఆక్స్ పామ్ నివేదిక తెలిపింది. ఈ రెండూ కోవిడ్ సంక్షోభం సందర్భంలో ముఖ్యంగా నష్టం కలిగించాయని నివేదిక పేర్కొంది. ఆరోగ్యం, విద్యా రంగాల్లో పెట్టుబడి పెట్టడానికి జనాభాలోని ధనవంతులైన 10% మందిపై 1% సర్‌ఛార్జ్ విధించాలని ఆక్స్‌ఫామ్ ప్రభుత్వానికి సిఫార్సు చేసింది. భారతదేశంలోని 10 మంది సంపన్న బిలియనీర్ల సంపద 25 సంవత్సరాలకు పైగా దేశంలోని పిల్లల పాఠశాల. ఉన్నత విద్యకు నిధులు సమకూర్చడానికి సరిపోతుందని పేర్కొంది. కరోనా ప్రారంభంలో 84% కుటుంబాలు ఆదాయంలో క్షీణతతో బాధపడుతున్నాయని, భారతదేశం పేదరికంలో అత్యధిక పెరుగుదలకు సబ్-సహారా ఆఫ్రికా తరహాలోనే ఉందని పేర్కొంది.

భారతీయుల రహస్య ఆస్తులు

పన్ను ఎగవేత కోసం ప్రపంచవ్యాప్తంగా సృష్టించిన 29 వేల ఆఫ్‌షోర్ కంపెనీలు, ప్రైవేట్ ట్రస్ట్‌ల వివరాలతో కూడిన 11.9 మిలియన్ పత్రాల సేకరణ , లీకైన పండోర పేపర్స్ ప్రకారం 380 కంటే ఎక్కువ మంది భారతీయులు 200 బిలియన్ రూపాయల విలువైన విదేశీ, స్వదేశీ ఆస్తులను కలిగి ఉన్నారని ఆక్స్ ఫామ్ నివేదిక తెలిపింది. బ్లూమ్‌బెర్గ్ బిలియనీర్స్ ఇండెక్స్ ప్రకారం, గౌతమ్ అదానీ గత సంవత్సరం దేశంలోనే అతిపెద్ద సంపదను, ప్రపంచంలో ఐదవ అతిపెద్ద సంపదను కలిగి ఉన్నట్లు తేలింది. కరోనాకాలంలో అదానీ సంపద 42.7 బిలియన్ డాలర్లు పెరిగిందని ఈ నివేదిక వెల్లడించింది. ఇది ఇప్పుడు దాదాపు 90 బిలియన్ డాలర్లతో సమానమని తెలిపింది. 2021లో ముఖేష్ అంబానీ నికర విలువ 13.3 బిలియన్ డాలర్లు పెరిగి ఇప్పుడు 97 బిలియన్ డాలర్లుగా ఉందని బ్లూమ్‌బెర్గ్ వెల్లడించింది.