500 కిలోల పూలు: ఫ్యామిలీతో రాహుల్ నామినేషన్

అమేథి: కాంగ్రెస్ పార్టీ ఉపాధ్యక్షుడు రాహుల్ గాంధీ ఉత్తరప్రదేశ్ రాష్ట్రంలోని అమేథిలో శనివారం నామినేషన్ దాఖలు చేశారు. నామినేషన్ వేసిన రాహుల్ వెంట ఆయన తల్లి, కాంగ్రెస్ పార్టీ అధ్యక్షురాలు సోనియా గాంధీ, సోదరి ప్రియాంక గాంధీ, ఆమె భర్త రాబర్ట్ వాద్రాలు ఉన్నారు. రెండు సార్లు విజయం సాధించిన అమేథి నుంచే మళ్లీ రాహుల్ పోటీ చేస్తున్నారు.

భారీ ఊరేగింపుతో నామినేషన్ వేసేందుకు రాహుల్ గాంధీ వచ్చారు. కార్యకర్తలు కూడా భారీ సంఖ్యలో రాహుల్ నామినేషన్ ర్యాలీలో పాల్గొన్నారు. రాహుల్ గాంధీపై పూలవర్షం కురిపించేందుకు స్థానిక కాంగ్రెస్ నాయకులు 500 కిలోల పూలను తీసుకువచ్చారు. కలెక్టరేట్ వరకు సాగిన రాహుల్ ర్యాలీలో ఆయనపై వారు పూల వర్షం కురిపించారు.

కాగా, అమేథీ నుంచి పోటీ చేస్తున్న రాహుల్ గాంధీకి ఈసారి మరో ఇద్దరు అభ్యర్థుల నుంచి గట్టి పోటీ ఎదురయ్యే అవకాశం లేకపోలేదు. అయితే అమేథీలో కాంగ్రెస్ పార్టీ గట్టి పట్టు ఉండటంతో గత మూడు ఎన్నికల్లోనూ ఆ పార్టీకే పట్టారు ఇక్కడి ప్రజలు. 2009 ఎన్నికల్లో రాహుల్ గాంధీకి 3.5 లక్షల మెజార్టీ ఓట్లు వచ్చాయి. అయితే ఇప్పుడు ఆ పరిస్థితి లేదు. రాహుల్ గాంధీ, సోనియా గాంధీ కోసం ఈ ఎన్నికల్లో ప్రియాంక గాంధీ ప్రచారం చేయనున్నారు.

ఈ ఎన్నికల్లో అమేథి నుంచి భారతీయ జనతా పార్టీ తరపున సినీ నటి, రాజ్యసభ సభ్యురాలు స్మృతి ఇరానీ పోటీ చేస్తున్నారు. ఆమ్ ఆద్మీ పార్టీ నుంచి రాజకీయాల్లోకి వచ్చిన కవి కుమార్ విశ్వాస్ బరిలో ఉన్నారు. ఇప్పటికే స్మృతీ ఇరానీ, కుమార్ విశ్వాస్ అమేథిలో రాహుల్ చేసిన అభివృద్ధిపై సవాల్ విసిరారు. రాహుల్ గాంధీ అమేథి నియోజక వర్గానికి చేసిన అభివృద్ధి ఏమిటో చెప్పాలని డిమాండ్ చేశారు.

English summary

Congress Vice President Rahul Gandhi today filed his nomination from Amethi in Uttar Pradesh in the presence of mother Sonia, sister Priyanka and her husband Robert Vadra. The Congress No. 2 is seeking re-election for a third consecutive term from the Lok Sabha constituency.