Anil Ambani: అంబానీ బ్రదర్ కు భారీ షాక్-ఐదేళ్ల బ్యాన్-25 కోట్ల ఫైన్..!

రిలయన్స్ ఇండస్ట్రీస్ అధినేత ముకేష్ అంబానీ సోదరుడు అనిల్ అంబానీకి ఇవాళ గట్టి ఎదురుదెబ్బ తగిలింది. అనిల్ అంబానీకి చెందిన రిలయన్స్ హోం ఫైనాన్స్ అక్రమాలపై స్టాక్ ఎక్చేంజ్ బోర్డ్ ఆఫ్ ఇండియా(సెబీ)కొరడా ఝళిపించింది. అనిల్ అంబానీపై ఐదేళ్ల పాటు ట్రేడింగ్ నిషేధం విధించడంతో పాటు రూ.25 కోట్ల జరిమానా కూడా విధించింది.
అనిల్‌ అంబానీకి చెందిన 24 కంపెనీలపై ఐదేళ్ల పాటు సెబీ నిషేధం వర్తించనుంది.

రిలయన్స్ హోమ్ ఫైనాన్స్ మాజీ ముఖ్య అధికారులతో సహా పారిశ్రామికవేత్త అనిల్ అంబానీ మరియు 24 ఇతర సంస్థలను సెక్యూరిటీస్ మార్కెట్ నుండి ఐదేళ్లపాటు ట్రేడింగ్ చేయకుండా నిషేధించింది. ఐదేళ్ల పాటు రెగ్యులేటర్‌లో నమోదైన ఏదైనా లిస్టెడ్ కంపెనీ లేదా మధ్యవర్తిగా డైరెక్టర్ లేదా కీ మేనేజర్ పర్సనల్ గా సేవలందించడంతో పాటు సెక్యూరిటీస్ మార్కెట్‌తో ఎలాంటి అనుబంధం లేకుండా నిషేధించింది.

తన 222 పేజీల తీర్పులో సెబీ.. అనిల్ అంబానీ, RHFL టాప్ ఎగ్జిక్యూటివ్‌లు RHFL నుండి అతనికి సంబంధించిన సంస్థలకు రుణాల ముసుగులో నిధులను మళ్లించడానికి ఒక మోసపూరిత కుట్ర చేసినట్లు నిర్ధారణకు వచ్చింది. బోర్డ్ ఆఫ్ డైరెక్టర్లు అలాంటి రుణ విధానాలను నిలిపివేయాలని, కార్పొరేట్ రుణాలను క్రమం తప్పకుండా సమీక్షించాలని సంస్థ ఆదేశాలు జారీ చేసినప్పటికీ, యాజమాన్యం ఈ సూచనలను విస్మరించిందని తెలిపింది.ఈ కుట్రను అనిల్ అంబానీ, అతని కంపెనీ యొక్క కీ మేనేజర్లు అమలు చేసినట్లు సెబీ తెలిపింది.

మార్చి 2018లో రూ. 59.60గా ఉన్న RHFL షేర్ ధర, మోసం బయటపడడంతో మార్చి 2020 నాటికి రూ.0.75కి పడిపోయింది. ఈ మోసంలో కీలక పాత్ర పోషించిన మాజీ ఆర్‌హెచ్‌ఎఫ్‌ఎల్ అధికారులు అమిత్ బాప్నా, రవీంద్ర సుధాల్కర్ , పింకేష్ ఆర్ షాలతో సహా 24 నియంత్రిత సంస్థలపై సెబీ జరిమానా విధించింది. అంబానీకి రూ.25 కోట్లు, బాప్నాకు రూ.27 కోట్లు, సుధాల్కర్‌కు రూ.26 కోట్లు, షాకు రూ.21 కోట్లు జరిమానా వేసింది. రిలయన్స్ యునికార్న్ ఎంటర్‌ప్రైజెస్, రిలయన్స్ ఎక్స్ఛేంజ్ నెక్స్ట్ లిమిటెడ్, రిలయన్స్ కమర్షియల్ ఫైనాన్స్ వంటి అనేక ఇతర సంస్థలపై కూడా రూ.25 కోట్ల జరిమానా విధించింది.

English summary

stock exchange board of india (sebi)today impose 5 year trading ban and rs.25cr penalty on anil ambani for irregularities in reliance home finance.