Super El Nino: రుతుపవనాల విఫలం, 1997లో ఏమైందో గుర్తుందిగా?

ప్రకృతి ప్రకోపానికి ప్రపంచం వణికిపోయే సమయం ఆసన్నమైందా? వందేళ్ల చరిత్రలోనే ఎన్నడూ చూడని రీతిలో పసిఫిక్ మహాసముద్రం అగ్నిగుండంలా మారబోతోందా? శాస్త్రవేత్తల తాజా హెచ్చరికలు చూస్తుంటే అవుననే సమాధానం వినిపిస్తోంది. ఈ ఏడాది జూన్ నుంచి భూమిపై 'సూపర్ ఎల్ నినో' (Super El Nino) విరుచుకుపడే అవకాశం ఉందని వాతావరణ నిపుణులు బాంబు పేల్చారు.

ప్రపంచ వాతావరణ చరిత్రలో 2026 ఒక గడ్డు సంవత్సరంగా మిగిలిపోయే ప్రమాదం కనిపిస్తోంది. పసిఫిక్ మహాసముద్ర ఉపరితల ఉష్ణోగ్రతలు అసాధారణంగా పెరగడం వల్ల ఏర్పడే 'ఎల్ నినో' ఈసారి 'సూపర్' స్థాయికి చేరుకుంటుందని యూరోపియన్ సెంటర్ ఫర్ మీడియం రేంజ్ వెదర్ ఫోర్‌కాస్ట్ (ECMWF) హెచ్చరించింది. సాధారణంగా ఎల్ నినో ప్రభావం వల్ల ఉష్ణోగ్రతలు పెరుగుతాయి, కానీ ఈసారి సముద్రపు నీటి వేడి సగటు కంటే 2.5 డిగ్రీల సెల్సియస్ ఎక్కువగా నమోదయ్యే అవకాశం ఉండటంతో దీనిని 'సూపర్ ఎల్ నినో'గా పిలుస్తున్నారు.

చరిత్ర పునరావృతమవుతుందా?

గతంలో 1982-83, 1997-98 మరియు 2015-16 సంవత్సరాల్లో భూమి ఇటువంటి తీవ్రమైన పరిస్థితులను ఎదుర్కొంది. ముఖ్యంగా 1997-98లో ఏర్పడిన ఎల్ నినో వల్ల ప్రపంచవ్యాప్తంగా వేల సంఖ్యలో మరణాలు సంభవించడమే కాకుండా, బిలియన్ల డాలర్ల ఆస్తి నష్టం వాటిల్లింది. అయితే, ప్రస్తుత గణాంకాల ప్రకారం 2026లో రాబోయే ముప్పు గత వందేళ్ల రికార్డులను తిరగరాస్తుందని శాస్త్రవేత్తలు అంచనా వేస్తున్నారు. మే నెలలో ప్రారంభమయ్యే ఈ ప్రక్రియ, ఆగస్టు నాటికి పూర్తి స్థాయిలో బలపడి ఏడాది చివరి వరకు కొనసాగే అవకాశం ఉంది.

Super El Nino: భారత్‌పై పడే ప్రభావం ఏంటి?

భారతదేశం వంటి వ్యవసాయ ఆధారిత దేశాలకు ఎల్ నినో అంటేనే ఒక పీడకల. ఈ ప్రభావం వల్ల:

• రుతుపవనాల విఫలం: రుతుపవనాలు అసాధారణంగా మారి, వర్షపాతం గణనీయంగా తగ్గే అవకాశం ఉంది.
• కరవు కోరల్లో భారత్: ముఖ్యంగా మధ్య- ఉత్తర భారతదేశంలో తీవ్రమైన కరవు పరిస్థితులు ఏర్పడవచ్చు. ఇది ఆహార భద్రతపై ప్రభావం చూపుతుంది.
• ఎండల తీవ్రత: సాధారణం కంటే 2 నుంచి 4 డిగ్రీల అదనపు ఉష్ణోగ్రతలు నమోదై, వడగాల్పులు ప్రజలను ఉక్కిరిబిక్కిరి చేయవచ్చు.

ప్రపంచవ్యాప్తంగా అస్తవ్యస్తం

కేవలం భారత్ మాత్రమే కాకుండా ఆస్ట్రేలియా, ఇండోనేషియా, బ్రెజిల్ మరియు మధ్య ఆఫ్రికా దేశాల్లో వర్షాభావ పరిస్థితులు నెలకొంటాయి. అదే సమయంలో దక్షిణ అమెరికాలోని పెరూ, ఈక్వెడార్ వంటి దేశాల్లో భారీ వర్షాలు, వరదలు ముంచెత్తే ప్రమాదం ఉంది. అట్లాంటిక్ సముద్రంలో తుపాన్ల వేగం తగ్గినప్పటికీ, పసిఫిక్ మహాసముద్ర ప్రాంతంలో హరికేన్ల ఉద్ధృతి పెరగనుంది.

ముందస్తు హెచ్చరిక.. మన బాధ్యత

ప్రస్తుతం అందుబాటులో ఉన్న వాతావరణ నమూనాలన్నీ (Weather Models) ఏకధాటిగా ఒకే హెచ్చరికను జారీ చేస్తున్నాయి. అంటే ముప్పు పొంచి ఉందనేది వాస్తవం. నీటి నిల్వలను పొదుపు చేసుకోవడం, ప్రత్యామ్నాయ పంటల వైపు మొగ్గు చూపడం మరియు ప్రకృతి వైపరీత్యాలను ఎదుర్కోవడానికి ప్రభుత్వాలు ఇప్పుడే సన్నద్ధం కావాలని నిపుణులు సూచిస్తున్నారు. ప్రకృతి సిద్ధం చేస్తున్న ఈ 'అగ్ని పరీక్ష'ను ఎదుర్కోవడానికి ప్రపంచం సిద్ధంగా ఉండక తప్పదు.

English summary

Scientists warn of a 'Super El Nino' forming in 2026, potentially the strongest in a century. Starting in June, this weather phenomenon is expected to trigger record-breaking temperatures, disrupt Indian monsoons, and cause severe droughts across Australia, Asia, and Africa while fueling floods in South America.