సీఎం ఎవరు అని ఢిల్లీలో డిసైడ్ అవుతుంది, 140 నాటౌట్ అంటున్న డీకేశీ, అయితే !

బెంగళూరు/న్యూఢిల్లీ: కర్ణాటక అసెంబ్లీ ఎన్నికల ఫలితాల తరువాత అధికారం మాదే అని బీజేపీ, కాంగ్రెస్, జేడీఎస్ పార్టీలు ధీమా వ్యక్తం చేస్తున్నాయి. కొన్ని సర్వేలు బీజేపీకి, కొన్ని సర్వేలు కాంగ్రెస్ కు అనుకూలంగా వచ్చాయి. కొన్ని సర్వేలు మాత్రం ఏ పార్టీకి పూర్తి మెజారిటీ రాదని, ఈసారికూడా జేడీఎస్ కింగ్ మేకర్ అని స్పష్టం చేశాయి.

కర్ణాటక అసెంబ్లీ ఎన్నికల్లో మా పార్టీ కచ్చితంగా 140 స్థానాలకు పైగా కైవసం చేసుకుంటుందని కేపీసీసీ అధ్యక్షుడు, మాజీ మంత్రి, ట్రబుల్ షూటర్ డీకే. శివకుమార్ ధీమా వ్యక్తం చేశారు. కర్ణాటకలో కాంగ్రెస్ పార్టీకి సంపూర్ణ మెజారిటీ వచ్చిన తరువాత ఎవరిని సీఎం చెయ్యాలని కాంగ్రెస్ పార్టీ హైకమాండ్ ఢిల్లీలో డిసైడ్ చేస్తుందని డీకే. శివకుమార్ స్పష్టం చేశారు.

శనివారం డీకే. శివకుమార్ పీటీఐ వార్త సంస్థతో మాట్లాడుతూ కర్ణాటక కాంగ్రెస్ పార్టీ నాయకులు సీఎం పదవి కోసం పోట్లాడుకోవడం లేదని అన్నారు. సీఎం సీటు విషయంలో మాజీ సీఎం సిద్దరామయ్య, డీకే శివకుమార్ పోట్లాడుకుంటున్నారని కొంతమంది కావాలనే తప్పుడు ప్రచారం చేస్తున్నారని డీకే. శివకుమార్ ఆరోపించారు.

కాంగ్రెస్ పార్టీ ఈనాటిది కాదు. ఎంతో చరిత్ర ఉన్న కాంగ్రెస్ పార్టీ సీఎం సీటు ఎవ్వరికి ఇవ్వాలని అని అన్ని ఆలోచించి నిర్ణయం తీసుకుంటుందని డీకే శివకుమార్ అన్నారు. కర్ణాటకలో అసెంబ్లీ ఎన్నికలు పూర్తి అయిన తరువాత కాంగ్రెస్ పార్టీ సీఎం రేసులో ఉన్న నాయకులు అందరితో చర్చించి సరైన నిర్ణయం తీసుకుంటుందని డీకే. శివకుమార్ చెప్పారు.

కేపీసీ అధ్యక్షుడిగా తాను బాధ్యతలు స్వీకరించిన తరువాత ఒక్కరోజు కూడా నిద్రపోకుండా బీజేపీ ప్రభుత్వం మీద పోరాటం చేస్తూనే ఉన్నానని, 78 లక్షల మందికి కాంగ్రెస్ పార్టీ సభ్యత్వం ఇచ్చామని, మేకదాటు ప్రాజెక్టు విషయంలో పోరాటం చేశామని, రాహుల్ గాంధీ జూడో యాత్ర కర్ణాటకలో విజయవంతం అయ్యేలా చేశానని డీకే శివకుమార్ చెప్పారు.

సీఎం సీటు విషయంలో కాంగ్రెస్ పార్టీ హైకమాండ్ తీసుకునే నిర్ణయానికి తాను కట్టుబడి ఉంటానని డీకే. శివకుమార్ స్పష్టం చేశారు. అయితే తాను సీఎం రేసులో ఉన్నానని, సీఎం రేసులో లేనని మాత్రం డీకే శివకుమార్ క్లారిటీ ఇవ్వలేదు. మొత్తం మీద కాంగ్రెస్ పార్టీ అధికారంలోకి వస్తుందని డీకే .శివకుమార్ ధీమా వ్యక్తం చేశారు.

English summary

The Congress party high command will decide who will be the CM, says DK Shivakumar.