ఫ్రెంచ్ ఫ్రైస్‌లా ఎముకలను నమిలిన జిరాఫీ

న్యూఢిల్లీ: మొన్నటికి మొన్న ఓ జింక- చనిపోయిన పామును తింటూ కనిపించింది. మాంసాహారం జోలికి వెళ్లని జింకలు.. చచ్చిన పామును తినడం దిగ్భ్రాంతికి గురి చేసింది. ఈ ఉదంతం.. సైన్స్‌కు సరికొత్త సవాల్‌ను విసిరిందని, ప్రకృతి తనలో దాచుకున్న ఓ రహస్యం వెలుగులోకి వచ్చిందనే అభిప్రాయాలు వ్యక్తం అయ్యాయి.

ఇప్పుడు సరిగ్గా అలాంటి ఉదంతమే మరొకటి బయటపడింది. జింకల్లాగే హెర్బివర్ జాతికి చెందిన ఓ జిరాఫీ- ఎముకలను నములుతూ కనిపించింది. అడవి దున్న కళేబరం నుంచి బయటికొచ్చిన రెండు ఎముకలను నోట కరచుకుని వాటిని నమలడం నెటిజన్లను షాక్‌కు గురి చేసింది. దీనికి సంబంధించిన ఓ వీడియో సోషల్ మీడియాలో వైరల్‌గా మారింది.

ఐఎఫ్ఎస్ అధికారి సుశాంత నందా ఈ వీడియోను తన అధికారిక ట్విట్టర్ అకౌంట్‌లో పోస్ట్ చేశారు. జిరాఫీ ఇలా ఎముకలను నమలడానికి గల కారణాలను కూడా ఆయన వివరించారు. జిరాఫీలు శాకాహారులే అయినప్పటికీ.. శరీరంలో కాల్షియం, ఫాస్పరస్‌ మోతాదు తక్కువైనప్పుడు వాటిని పెంచుకోవడానికి ఇలా ఎముకలను నములుతుంటాయని చెప్పారు.

ఎముకల్లో ఉన్న ఫాస్పరస్ మొత్తాన్నీ పీల్చివేసిన తరువాత వాటిని పడేస్తాయని, ఇది సాధారణంగా జరిగే ప్రక్రియేనని పేర్కొన్నారు. జిరాఫీలు ప్రపంచంలోనే ఎత్తైన శాకాహార జంతువులనే విషయం తెలిసిందే. వివిధ రకాల వృక్ష జాతులను అవి ఆహారంగా స్వీకరిస్తుంటాయి. ఈ ప్రక్రియను ఆస్టియోఫాగియా అని పిలుస్తారు. బాగా నమిలిన తరువాత అవి ఎముకలను మింగవు.

Giraffes are herbivores & use their long necks to reach the leaves & buds in the tree top. They have evolved that way.

But sometimes chew & eat bones to get phosphorus. Nature is amazing. https://t.co/Llw6bHRj9I pic.twitter.com/VkICSn1lin

— Susanta Nanda (@susantananda3) June 12, 2023

అందులోని పోషకాలను పొందిన తరువాత వాటిని పడేస్తాయి. తమ శరీరానికి అవసరమైన పోషకాలను పొందడానికి జిరాఫీలు తరచూ అడవి జంతువుల కళేబరాల నుంచి కొమ్ములు, ఎముకలు, ఏనుగు దంతాలను కూడా నములుతుంటాయి. ఈ వీడియో సోషల్ మీడియాలో వైరల్‌గా మారింది. దీన్నొక అద్భుతంగా అభివర్ణిస్తోన్నారు నెటిజన్లు. ఇలాంటివెన్నో ప్రకృతిలో దాగి ఉన్నాయంటూ వ్యాఖ్యానిస్తోన్నారు.

English summary

Now, a viral video of Giraffe chewing bones leaves internet in disbelief after a Deer eating Snake.