ఇండియా టీవీ సర్వే: మోడీదే హవా.. ఏ రాష్ట్రంలో ఎన్ని సీట్లు అంటే, తెరాసకు 14, వైసీపీకి 22, టీడీపీకి 3

Updated: Sunday, March 10, 2019, 22:39 [IST]

న్యూఢిల్లీ: 2019 సార్వత్రిక ఎన్నికల్లో భారతీయ జనతా పార్టీ నేతృత్వంలోని ఎన్డీయే తిరిగి అధికారంలోకి వస్తుందని ప్రీ పోల్ సర్వే ఫలితాలు చెబుతున్నాయి. 2014 ఎన్నికల్లో కంటే దాదాపు నలభై సీట్లు తగ్గుతాయని, కానీ ఎన్డీయేనే అధికారంలోకి వస్తుందని ఈ సర్వేలో వెల్లడైంది. బీజేపీకి 238 సీట్లు, ఆ పార్టీ నేతృత్వంలోని ఎన్డీయే కూటమికి 285 సీట్లు వస్తాయని ఫలితాలు చెబుతున్నాయి. ఈ మేరకు ఇండియా టీవీ - సీఎన్ఎక్స్ ఒపీనియన్ పోల్ సర్వే ఫలితాలు ఆదివారం వెల్లడయ్యాయి.

గత ఎన్నికల కంటే 44 సీట్లు తక్కువ

బీజేపీకి 2014లో ఒంటరిగా 282 సీట్లు వచ్చాయి. ఈసారి 238 సీట్లు వస్తాయని ఈ సర్వేలో తేలింది. అంటే గతంలో కంటే 44 సీట్లు తక్కువ వస్తాయి. అదే సమయంలో ఎన్డీయే కూటమికి గత ఎన్నికల్లో 355 సీట్లు ఉండగా, ఈసారి 285 రానున్నాయి. శివసేన, అకాలీదళ్, అన్నాడీఎంకే, జనతా దళ్ (యూ), ఎల్జేపీ, పీఎంకే తదితర పార్టీలు ఎన్డీయేలో ఉన్నాయి.

గతంలో కంటే కాస్త పుంజుకోనున్న కాంగ్రెస్

యూపీఏ కూటమిలో డీఎంకే, తెలుగుదేశం, జేడీఎస్, ఆర్ఎల్డీ, జేఎంఎం, ఎన్సీపీ, నేషనల్ కాన్ఫరెన్స్, ఐయూఎంఎల్ తదితర పార్టీలు ఉన్నాయి. గత ఎన్నికల్లో యూపీఏ 80 సీట్లు గెలిచింది. ఈ సారి 126 సీట్లు గెలుచుకోనుందని ఫలితాలు వెల్లడిస్తున్నాయి. గతంలో కంటే 46 సీట్లు ఎక్కువగా రానున్నాయి. కాంగ్రెస్ పార్టీ స్వయంగా 82 సీట్లు గెలుచుకోనుంది. గత ఎన్నికల్లో కాంగ్రెస్ 44 స్థానాలకే పరిమితమైంది. గతంలో కంటే 38 సీట్లు ఎక్కువగా గెలవనుంది.

ఎస్పీ-బీఎస్పీకి 34, బీజేపీకి 40

ఉత్తర ప్రదేశ్‌లో బీఎస్పీ, ఎస్పీ కూటమికి 34 సీట్లు రానున్నాయని ఈ సర్వేలో తేలింది. బీఎస్పీకి 16, ఎస్పీకి 18 సీట్లు వస్తాయని తేలింది. గత ఎన్నికల్లో 71 సీట్లు గెలిచిన బీజేపీ ఈసారి 40 వరకు గెలవనుందని ప్రీపోల్ సర్వే ఫలితాలు వెల్లడించాయి.

సర్వేలో ఎంతమంది పాల్గొన్నారంటే

ఇండియా టీవీ-సీఎన్ఎక్స్ ప్రీపోల్ సర్వేలో 38,600 మంది పాల్గొన్నారు. ఇందులో 20,455 మంది పురుషులు, 18,145మంది మహిళలు ఉన్నారు. ఈ సర్వే 193 లోకసభ నియోజకవర్గాల పరిధిలో నిర్వహించారు. అన్ని కేంద్ర పాలిత, అన్ని రాష్ట్రాలలోను సర్వే చేశారు. ఈ సర్వేను మార్చి 1వ తేదీ నుంచి మార్చి 7వ తేదీ మధ్య నిర్వహించారు.ఏపీలో వైసీపీకి 22, టీడీపీకి 3, కాంగ్రెస్‌కు 0, తెలంగాణలో తెరాసకు 14, మజ్లిస్ పార్టీకి 1, కాంగ్రెస్‌కు 2 వస్తాయని సర్వేలో తేలింది.