భారత్ చేతికి రష్యా బ్రహ్మాస్త్రం.. 2026 నాటికి S-400 డెలివరీ..!

పహల్గాం ఉగ్రదాడి తర్వాత పాకిస్థాన్ పై భారత్ చేపట్టిన ఆపరేషన్ సింధూర్ లో దాయాదికి చుక్కలు చూపించింది ఎస్-400 ఎయిర్ డిఫెన్స్ మిసైల్ సిస్టమ్. యుద్ధ సమయంలో పాకిస్థాన్ భారత్ పై సంధించిన డ్రోన్ లు, క్షిపణులను ఎస్-400 ఎయిర్ డిఫెన్స్ మిసైల్ సిస్టమ్ సమర్థవంతంగా తిప్పికొట్టింది. ఇప్పటికే రష్యా నుంచి నాలుగు ఎస్-400 రక్షణ వ్యవస్థలను భారత్ కొనుగోలు చేసిన విషయం తెలిసిందే. ఇక చివరి డిఫెన్స్ మిసైల్ సిస్టమ్ వచ్చే ఏడాదికి పూర్తి చేయనున్నట్లు రష్యా నుంచి స్పష్టమైన సంకేతాలు వచ్చాయి. ఈ విషయాన్ని రష్యా మీడియా సంస్థ TASS ధ్రువీకరించింది.

భారత్, రష్యా మధ్య 2018 లో 5.5 బిలియన్ డాలర్లు ఒప్పందం కుదిరింది. ఈ డీల్ ప్రకారం మొత్తం ఐదు ఎస్-400 ఎయిర్ డిఫెన్స్ మిసైల్ సిస్టమ్ లను భారత్ కు అప్పగించాల్సి ఉంది. ఇప్పటికే నాలుగు అందజేయగా.. 2026 నాటికి చివరి డిఫెన్స్ మిసైల్ సిస్టమ్ ను అందించనుంది. ఇక పహల్గాం ఉగ్రదాడి తర్వాత పాకిస్థాన్​ పై చేపట్టిన ఆపరేషన్‌ సింధూర్‌ వేళ ఎస్‌-400 ప్రపంచ రికార్డు సృష్టించింది. పాకిస్థాన్ డ్రోన్ లు, క్షిపణులపై విరుచుకుపడింది.

ఇక S-400 ప్రపంచంలోని అత్యుత్తమ వైమానిక రక్షణ వ్యవస్థలలో ఒకటిగా ఉంది. ఈ రక్షణ వ్యవస్థ ఉపరితలం నుండి గాలిలోని క్షిపణులపై దాడి చేస్తుంది. దీన్ని రష్యాకు చెందిన అల్మాజ్-ఆంటె అనే కంపెనీ రూపొందించింది. ఇది ప్రపంచంలోనే అత్యంత అధునాతన వాయు రక్షణ వ్యవస్థ గా ఉంది. 600 కిలోమీటర్ల దూరంలో ఉన్న లక్ష్యాన్ని ట్రాక్ చేసే సత్తా ఈ క్షిపణికి ఉంది. అంతేకాక 5 మీటర్ల నుండి 30 కిలోమీటర్ల ఎత్తులో ఉన్న లక్ష్యాలను ఛేదించగలదు.