Iran Israel War: ఇరాన్లోని ఫోర్డో అణు స్థావరంతో సైనిక విమానాశ్రయాలపై ఇజ్రాయెల్ దాడి
Iran Israel War: అమెరికా బాంబుల దాడి చేసిన ఒక రోజు తర్వాత ఇజ్రాయెల్ ఇరాన్లోని ఫోర్డో అణు స్థావరంపై సోమవారం మరోసారి దాడి చేసిందని ఇరాన్ మీడియా నివేదించింది. అమెరికా మద్దతుతో ధైర్యం తెచ్చుకున్న ఇజ్రాయెల్ ఇరాన్పై కొత్త దాడులను ప్రారంభించడంతో సైనిక మౌలిక సదుపాయాలపై అత్యంత తీవ్రమైన దాడులలో ఇది ఒకటి అని ఇజ్రాయెల్ ప్రకటించింది.
ఇరాన్లోని సైనిక విమానాశ్రయాలపై ఇజ్రాయెల్ దాడి
మరో వైపు ఇరాన్పై మరోసారి విరుచుకుపడినట్లు ఇజ్రాయెల్ రక్షణ దళాలు వెల్లడించాయి. ఇజ్రాయెల్ సైన్యం సోమవారం ఇరాన్లోని పశ్చిమ, తూర్పు, మధ్య ప్రాంతాలలో దాదాపు ఆరు సైనిక విమానాశ్రయాలపై వైమానిక దాడులు నిర్వహించినట్లు ప్రకటించింది. ఈ దాడులలో వారు ఒక ఇంధనం నింపే విమానాన్ని, ఎఫ్-14, ఎఫ్-5, ఏహెచ్-1 విమానాలను ధ్వంసం చేసినట్లు నివేదించబడింది. ఈ రెండు దేశాల మధ్య పోరాటం 11వ రోజుకు చేరుకోగా, ఇజ్రాయెల్ సైన్యం మధ్య ఇరాన్లోని ఉపరితలం నుండి ఉపరితలానికి ప్రయోగించే క్షిపణి నిల్వ కేంద్రాలను కూడా లక్ష్యంగా చేసుకున్నట్లు తెలిపింది.
పశ్చిమ ఇరాన్లోని కెర్మాన్షా ప్రాంతంలో 15కు పైగా యుద్ధ విమానాలు దాడి చేసి, "ఇజ్రాయెల్ భూభాగాన్ని లక్ష్యంగా చేసుకున్న అనేక ఉపరితలం నుండి ఉపరితలానికి ప్రయోగించే క్షిపణి నిల్వ కేంద్రాలను ధ్వంసం చేశాయని ఇజ్రాయెల్ డిఫెన్స్ ఫోర్సెస్ ఒక ప్రకటనలో తెలిపింది. ఇజ్రాయెల్ దేశాన్ని రక్షించడానికి ఇరాన్ పాలనకు చెందిన సైనిక సామర్థ్యాలను తగ్గించడానికి, ఇరాన్ గగనతలంలో వాయు ఆధిపత్యాన్ని సాధించడానికి ఐడీఎఫ్ తన ప్రయత్నాలను కొనసాగిస్తోందని తేల్చి చెప్పింది. ఈ దాడుల్లో రన్వేలు, భూగర్భ బంకర్లు, ఒక ఇంధనం నింపే విమానం, ఎఫ్-14, ఎఫ్-5, ఏహెచ్-1 విమానాలు ధ్వంసమయ్యాయని ఐడీఎఫ్ పేర్కొంది. ధ్వంసమైన ఇరాన్ విమానాలను ఇజ్రాయెల్కు వ్యతిరేకంగా ఉపయోగించడానికి ఉద్దేశించినవని ఇజ్రాయెల్ సైన్యం వెల్లడించింది.
ఇజ్రాయెల్ జూన్ 13న ఇరాన్పై పెద్ద ఎత్తున వైమానిక దాడులను ప్రారంభించింది. ఇరాన్ క్షిపణి, అణు సదుపాయాలు, అలాగే సైనిక నాయకులు, భద్రతా సేవలను లక్ష్యంగా చేసుకుంది. సోమవారం తెల్లవారుజామున ఇరు పక్షాల మధ్య వైమానిక దాడులు తీవ్రమయ్యాయి. వారాంతంలో అమెరికా యుద్ధ విమానాలు మూడు ఇరాన్ అణు స్థావరాలపై "బంకర్-బస్టర్" బాంబులను ప్రయోగించిన తర్వాత ప్రతీకారం తీర్చుకుంటామని ఇరాన్ హెచ్చరించింది. అమెరికా అధ్యక్షుడు డొనాల్డ్ ట్రంప్.. అమెరికా చేసిన దాడి ఇరాన్ అణు సామర్థ్యాలను "తుడిచిపెట్టిందని" తేల్చి చెప్పారు. ఆదివారం ఇరాన్లోని మూడు అణు కేంద్రాలపై అమెరికా వైమానిక దాడులు చేసిన తర్వాత, టెల్ అవీవ్, హైఫా వంటి ప్రధాన ఇజ్రాయెల్ నగరాలను లక్ష్యంగా చేసుకుని ఇరాన్ క్షిపణి దాడి చేసిన ఒక రోజు తర్వాత ఇజ్రాయెల్ ఈ దాడులకు దిగింది.
Click it and Unblock the Notifications
Sign in with Google