తప్పలేదు.. రాత్రంతా చెట్టు మీదే ఉండిపోయిన పైలెట్
బెర్లిన్ : 'చెట్టు కింద ప్లీడర్' లాగా.. చెట్టు మీద పైలెట్ ఏంటనుకున్నారా? ఓ చిన్న విమాన ప్రమాదంతో.. పైలెట్ 12 గంటల పాటు చెట్టు మీదే ఉండిపోయాడు. రాత్రి సమయం కావడం.. 30 మీటర్ల ఎత్తున్న చెట్టు మీద పైలెట్ చిక్కుకుపోవడంతో.. సహాయక చర్యలు వీలు పడలేదు. దీంతో సదరు పైలెట్ రాత్రంతా అదే చెట్టుపై గడపాల్సి వచ్చింది.
అసలు విషయమేంటంటే.. జర్మనీలో ఓ తేలికపాటి విమానం చెట్ల మీద కూలిపోయింది. జర్మనీ నైరుతి ప్రాంతంలో గల బాడెన్ - వుర్టెమ్ బెర్గ్ రాష్ట్రంలో సోమవారం సాయంత్రం సమయంలో ఈ ఘటన చోటు చేసుకుంది. ఆ తర్వాత అధికారులకు సమాచారం అందేసరికి చీకటికి పడింది.
అనంతరం అక్కడకు చేరుకున్న అదికారులు ఘటనా ప్రాంతాన్ని పరిశీలించి.. ఆ సమయంలో ఎటువంటి చర్యలు చేపట్టకపోవడమే మంచిదని నిర్దారించారు. ఒకవేళ సహాయ చర్యల్లో ఏమైనా తప్పిదం చోటు చేసుకుంటే.. 30 అడుగుల ఎత్తు నుంచి విమానం కిందపడినప్పుడు మంటలు చెలరేగే అవకాశం ఉండడంతో ఆ నిర్ణయం తీసుకున్నారు అధికారులు. దీంతో ఆ పైలెట్ కు చెట్టు మీదే నిద్రపోక తప్పలేదు.
కాగా, మరుసటిరోజు ఉదయం చెట్లల్లో చిక్కుకుపోయిన ఆ 59 ఏళ్ల పైలెట్ ను అధికారులు సురక్షితంగా రక్షించారు. ప్రమాద ముప్పు తప్పడంతో.. పైలెట్ తో పాటు మిగతా అధికారులంతా 'హమ్మయ్యా' అనుకున్నారు.